Petrol Price
फसवणुकीच्या गुन्ह्यात सात वर्षांपासून फरार आरोपी स्थानिक गुन्हे शाखेच्या ताब्यात
विदर्भ न्यूज एक्सप्रेस
प्रतिनिधी / चंद्रपूर : फसवणुकीच्या गुन्ह्यात मागील सात वर्षांपासून फरार असलेल्या पाहिजे आरोपीला चंद्रपूर स्थानिक गुन्हे शाखेच्या पथकाने भंडारा जिल्ह्यातून ताब्यात घेतले. बसण वनवास राऊत ४९ वर्षे रा. पिंपरी चुन्नी, ता. तुमसर, जि. भंडारा असे आरोपीचे नाव असून, त्याला पुढील कायदेशीर कारवाईसाठी नागभीड पोलिसांच्या स्वाधीन करण्यात आले आहे.
नागभीड पोलीस ठाण्यात २०१९ मध्ये दाखल झालेल्या अप. क्र. ७४/२०१९ मधील भारतीय दंड विधानाच्या कलम ४२०, ४६८, ४७१ आणि ३४ अन्वये गुन्ह्यात बसण राऊत हा पाहिजे आरोपी होता. या गुन्ह्यात तो मागील सात वर्षांपासून फरार असल्याने पोलीस त्याच्या शोधात होते. दरम्यान, स्थानिक गुन्हे शाखेच्या पथकाला आरोपीबाबत गोपनीय माहिती मिळाली. या माहितीच्या आधारे पथकाने भंडारा जिल्ह्यात शोधमोहीम राबवून त्याला ताब्यात घेतले.
त्यानंतर पुढील तपास आणि कायदेशीर कारवाईसाठी त्याला नागभीड पोलीस ठाण्याच्या ताब्यात देण्यात आले.
ही कारवाई चंद्रपूर स्थानिक गुन्हे शाखेचे पोलीस निरीक्षक अमोल काचोरे यांच्या नेतृत्वाखाली ब्रह्मपुरी उपविभागीय पथकाने केली. सात वर्षांपासून फरार असलेल्या आरोपीला ताब्यात घेतल्याने स्थानिक गुन्हे शाखेच्या कारवाईला यश आले आहे.
