Petrol Price
वन्यजीव संवर्धनासाठी तंत्रज्ञानाची झेप : वाइल्ड हॅक २०२६ राष्ट्रीय हॅकाथॉन बीआयटी बल्लारपूर येथे उत्साहात संपन्न
विदर्भ न्यूज एक्सप्रेस
तालुका प्रतिनिधी / बल्लारपूर : मानवी-वन्यजीव संघर्षावर प्रभावी उपाय शोधण्यासह वन्यप्राण्यांची ओळख, वन्यजीव गुन्ह्यांवर नियंत्रण आणि जंगलातील वणव्यांचा शोध घेण्यासाठी आधुनिक तंत्रज्ञानाचा वापर करण्याच्या उद्देशाने आयोजित वाइल्ड हॅक २०२६ या राष्ट्रीय हॅकाथॉन व आयडियाथॉन स्पर्धेला उत्स्फूर्त प्रतिसाद मिळाला. बल्लारपूर इन्स्टिट्यूट ऑफ टेक्नॉलॉजी (बीआयटी) आणि सिनोरा-एआय लॅब्स यांच्या संयुक्त विद्यमाने तसेच ताडोबा-अंधारी व्याघ्र प्रकल्पाच्या सहकार्याने आयोजित या दोन दिवसीय स्पर्धेत देशभरातील विविध नामांकित शिक्षण संस्थांमधील १८० हून अधिक विद्यार्थ्यांनी सहभाग घेतला. स्पर्धेत विद्यार्थ्यांनी वन्यजीव संवर्धनासाठी तंत्रज्ञानावर आधारित नाविन्यपूर्ण संकल्पना सादर केल्या.
स्पर्धेच्या उद्घाटनप्रसंगी ताडोबा-अंधारी व्याघ्र प्रकल्पाचे क्षेत्र संचालक डॉ. प्रभु नाथ शुक्ला यांनी विद्यार्थ्यांना मार्गदर्शन केले. वन्यजीव संवर्धन आणि जंगल व्यवस्थापनातील विविध आव्हानांवर मात करण्यासाठी आधुनिक तंत्रज्ञान महत्त्वपूर्ण भूमिका बजावू शकते, असे त्यांनी अधोरेखित केले. व्याघ्र प्रकल्पाचे उपसंचालक आनंद रेड्डी येल्लू यांनी स्पर्धास्थळी भेट देऊन सहभागी विद्यार्थ्यांशी संवाद साधला आणि त्यांच्या तंत्रज्ञानाधारित संकल्पनांचे कौतुक केले.
यावेळी तंत्रज्ञान व उत्पादन रणनीती तज्ज्ञ पराग गुप्ता, ताडोबा-अंधारी व्याघ्र प्रकल्पाचे प्रतिनिधी गणेश, बीआयटीचे अध्यक्ष संजय वासाडे, संचालक तथा प्राचार्य डॉ. रजनीकांत मिश्रा, संचालक (अकॅडेमिक्स) डॉ. सत्यनारायण चनगला, पॉलिटेक्निकचे प्राचार्य डॉ. श्रीकांत गोजे, विद्यार्थी विकास सेलच्या अधिष्ठाता डॉ. अर्चना निमकार आणि संशोधन विभागाचे अधिष्ठाता डॉ. झेड. जे. खान उपस्थित होते. अमेरिकेतील जॉर्ज मेसन विद्यापीठाचे प्राध्यापक डॉ. पद्मनाभन (साधू) शेशैयर यांनी ऑनलाइन माध्यमातून विद्यार्थ्यांना मार्गदर्शन केले.
नागपूर, पुणे, हैदराबाद यांसह विविध भागांतील १०० हून अधिक संघांनी या स्पर्धेत सहभाग नोंदवला. हॅकाथॉनमधील प्रकल्पांचे मूल्यमापन करण्यासाठी उद्योग क्षेत्रातील तज्ज्ञ पराग गुप्ता, बीआयटीचे माजी विद्यार्थी व उद्योग तज्ज्ञ लव्हली शर्मा, परीक्षक पीयूष गुप्ता, ताडोबा प्रकल्पाचे प्रतिनिधी गणेश आणि डॉ. सत्यनारायण चनगला यांचा समावेश असलेली समिती कार्यरत होती. आयडियाथॉनच्या मूल्यमापनासाठी डॉ. अर्चना निमकार, सुनील कुंटवार आणि मृणाली वैद्य यांच्या तज्ज्ञ समितीने काम पाहिले. विद्यार्थिनी सोहा धानोरकर, झैद शेख आणि स्वागत सोनुले यांनी कार्यक्रमाचे सूत्रसंचालन केले.
हॅकाथॉन स्पर्धेत नागपूर येथील यशवंतराव चव्हाण अभियांत्रिकी महाविद्यालयाच्या ‘जिनियस ग्रिड’ संघाने प्रथम क्रमांक पटकावत ५० हजार रुपयांचे पारितोषिक मिळवले. बल्लारपूर इन्स्टिट्यूट ऑफ टेक्नॉलॉजीच्या वाइल्डबाइट संघाने ३० हजार रुपयांचे पारितोषिक मिळवत द्वितीय क्रमांक पटकावला, तर नागपूर येथील सेंट व्हिन्सेंट पॅलोटी अभियांत्रिकी व तंत्रज्ञान महाविद्यालयाच्या हशिरा डॉट एक्सई संघाने २० हजार रुपयांचे पारितोषिक मिळवत तृतीय क्रमांक मिळवला.
रामदेवबाबा विद्यापीठाच्या हॅकऑप्स आणि सेंट व्हिन्सेंट पॅलोटी महाविद्यालयाच्या टीम सुदर्शन या संघांना प्रत्येकी पाच हजार रुपयांचे विशेष पारितोषिक देण्यात आले. आयडियाथॉन स्पर्धेत यशवंतराव चव्हाण अभियांत्रिकी महाविद्यालयाच्या रॉक्सॉन संघाने प्रथम क्रमांक मिळवत १० हजार रुपयांचे पारितोषिक पटकावले. हैदराबाद येथील मल्ला रेड्डी विद्यापीठाच्या रेव्हन्स संघाने द्वितीय क्रमांक मिळवत पाच हजार रुपयांचे पारितोषिक प्राप्त केले. दोन्ही स्पर्धांमध्ये विजेत्यांना एकूण एक लाख २५ हजार रुपयांची पारितोषिके वितरित करण्यात आली.
या स्पर्धेचे वैशिष्ट्य म्हणजे विद्यार्थ्यांनी सादर केलेल्या संकल्पना केवळ स्पर्धेपुरत्या मर्यादित न राहता त्यांचा प्रत्यक्ष वन व्यवस्थापनात वापर होण्याची शक्यता आहे. ताडोबा-अंधारी व्याघ्र प्रकल्पाकडून या तंत्रज्ञानाधारित उपायांची पुढील तांत्रिक तपासणी करण्यात येणार असून, योग्य ठरणाऱ्या संकल्पनांचा वन्यजीव संरक्षणासाठी उपयोग होऊ शकतो. शिक्षण संस्था, तंत्रज्ञान क्षेत्र आणि वन प्रशासन यांच्या संयुक्त प्रयत्नांतून वन्यजीव संवर्धनाला नवी दिशा देण्याचा प्रयत्न ‘वाइल्ड हॅक २०२६’च्या माध्यमातून करण्यात आला आहे.
