Petrol Price
गडचिरोली जिल्ह्यात मोदी गाथा कार्यक्रमाला नागरिकांचा उत्स्फूर्त प्रतिसाद
- चामोर्शी, गडचिरोली व धानोरा तालुक्यांत विविध ठिकाणी कार्यक्रमांचे आयोजन; व्यसनमुक्ती आणि शासकीय योजनांच्या लाभाबाबत जनजागृती
विदर्भ न्यूज एक्सप्रेस
तालुका प्रतिनिधी / घोट : गडचिरोली विधानसभा मतदारसंघातील विविध गावांमध्ये आयोजित करण्यात आलेल्या मोदी गाथा कार्यक्रमाला नागरिकांचा उत्स्फूर्त प्रतिसाद मिळाला. चामोर्शी, गडचिरोली आणि धानोरा तालुक्यांतील नागरिकांनी मोठ्या संख्येने उपस्थिती लावत या कार्यक्रमाचा उत्साहाने आस्वाद घेतला. या कार्यक्रमाच्या माध्यमातून व्यसनाधीनतेचे दुष्परिणाम, व्यसनमुक्त जीवनाचे महत्त्व तसेच केंद्र व राज्य शासनाच्या विविध लोककल्याणकारी योजनांची माहिती नागरिकांपर्यंत पोहोचविण्यात आली.
गडचिरोली विधानसभा मतदारसंघाचे आमदार मिलिंद नरोटे, माजी खासदार अशोक नेते आणि भाजपचे जिल्हाध्यक्ष प्रा. रमेश बारसागडे यांच्या नेतृत्वाखाली या कार्यक्रमांचे आयोजन करण्यात आले. मोदी गाथा कार्यक्रमाचे जिल्हा समन्वयक प्रणय खुणे आणि सहसमन्वयक साई सिल्लमवार यांच्या मार्गदर्शनाखाली मतदारसंघातील विविध ठिकाणी कार्यक्रम पार पडले.
व्यसनमुक्त जीवनाचा संदेश -
आजच्या काळात समाजातील अनेक नागरिक व्यसनाधीनतेच्या विळख्यात अडकत असून, त्याचा परिणाम त्यांच्या वैयक्तिक आयुष्यावर, कुटुंबावर आणि आर्थिक परिस्थितीवर होत आहे. या पार्श्वभूमीवर मोदी गाथा कार्यक्रमातून व्यसनाधीनतेच्या समस्येवर प्रकाश टाकण्यात आला. नागरिकांनी व्यसनांपासून दूर राहून निरोगी, आनंदी आणि सन्मानपूर्वक जीवन जगावे, असा संदेश यावेळी देण्यात आला.
व्यसनांमुळे होणारे आर्थिक नुकसान टाळून कुटुंबाच्या प्रगतीकडे लक्ष देणे आवश्यक आहे. त्याचबरोबर युवकांसह सर्व नागरिकांनी सकारात्मक विचारसरणी स्वीकारून स्वतःच्या आणि कुटुंबाच्या उज्ज्वल भविष्यासाठी प्रयत्न करावेत, असे आवाहन कार्यक्रमाच्या माध्यमातून करण्यात आले.
शासकीय योजनांचा लाभ घेण्याचे आवाहन -
केंद्र व राज्य शासनाच्या विविध कल्याणकारी योजनांमुळे सर्वसामान्य नागरिकांचे जीवनमान उंचावण्यास मदत होत असल्याचा मुद्दा कार्यक्रमात अधोरेखित करण्यात आला. शासनाच्या योजनांची माहिती घेऊन पात्र लाभार्थ्यांनी त्यांचा लाभ घ्यावा, असे आवाहन करण्यात आले.
केवळ योजनांची माहिती मिळविण्यापुरते मर्यादित न राहता, त्यांचा योग्य उपयोग करून आर्थिक प्रगती साधावी, कुटुंबाची परिस्थिती सुधारावी आणि स्वावलंबी जीवन जगण्याच्या दिशेने वाटचाल करावी, हा संदेशही या कार्यक्रमातून देण्यात आला.
पदाधिकारी व कार्यकर्त्यांची उपस्थिती -
या कार्यक्रमाला राष्ट्रीय मानवाधिकार संघटनेचे जिल्हाध्यक्ष रमेश अधिकारी, जिल्हा उपाध्यक्ष नानू उपाध्ये, मास्टर किशोर कुंडू, दिनेश मुजुमदार, संदीप भोवरे, पलाश घरामी, सुमेन विश्वास, समीरण रॉय, तारक हलदर, विलास वडेट्टीवार यांच्यासह विविध पदाधिकारी आणि कार्यकर्ते मोठ्या संख्येने उपस्थित होते.
गडचिरोली विधानसभा मतदारसंघातील विविध गावांमध्ये आयोजित करण्यात आलेल्या या कार्यक्रमाला नागरिकांनी दिलेल्या उत्स्फूर्त प्रतिसादामुळे व्यसनमुक्ती, शासकीय योजनांची माहिती आणि आर्थिक उन्नतीविषयी जनजागृती करण्याच्या उपक्रमाला चालना मिळाली. नागरिकांनी व्यसनांपासून दूर राहून शासनाच्या योजनांचा लाभ घ्यावा आणि स्वतःच्या प्रगतीसोबतच समाजाच्या विकासातही योगदान द्यावे, हा संदेश या कार्यक्रमातून देण्यात आला.
