वायुसेनेच्या हवाई तळावरील पंतप्रधान नरेंद्र मोदी यांच्या हेलिकॉप्टरचा फोटो लीक, दहशतवाद विरोधी पथकाने दोघांना घेतले ताब्यात


विदर्भ न्यूज एक्सप्रेस 
प्रतिनिधी / नागपूर : 
वायुसेनेच्या हवाई तळावरील पंतप्रधान नरेंद्र मोदी यांच्या हेलिकॉप्टरचा फोटो लीक झाल्याची धक्कादायक माहिती समोर आली आहे. याप्रकरणी दहशतवाद विरोधी पथकाने मुंबईच्या नालासापोरा व नागपुरातील एकाला ताब्यात घेतल्याची माहिती मिळाली आहे.  ताब्यात घेतलेल्यांची  चौकशी केली जात असल्याची माहिती प्राप्त झाली  आहे.
विधानसभा निवडणुकांसाठी पंतप्रधान नरेंद्र मोदी यांची १३ ऑक्टोबर रोजी भंडारा जिल्ह्यातील साकोली येथे प्रचारसभा आयोजित करण्यात आली होती. त्यासाठी मोदी प्रथम नागपूर येथे आले. त्यानंतर नागपूर येथून एका हेलिकॉप्टरने ते साकोली येथे गेले. हे हेलिकॉप्टर वायुसेनेचे होते. नागपूर विमानतळाच्या परिसरातच वायुसेनेचेही हेलिपॅड आहे. या हेलिपॅडवर हे हेलिकॉप्टर ठेवण्यात आले होते. हे क्षेत्र अत्यंत संवेदनशील असल्याने सामान्य नागरिकांसाठी ते प्रतिबंधित आहे. या हेलिपॅडवरील हेलिकॉप्टरचा फोटो लीक झाल्याचे सांगितले जात आहे. वायुसेनेच्या गोपनीय विभागाकडून ही माहिती एटीएसला देण्यात आल्याचे सांगितले जात आहे. हा फोटो नेमका नागपुरातीलच आहे का? तो कुणी काढला आणि कसा लीक झाला याची चौकशी एटीएस करीत आहे. या प्रकरणी एटीएसने मुंबईतील नालासोपारा परिसरातील व नागपुरातील एकाला ताब्यात घेतल्याचे समजते. मुंबईतील या व्यक्तीकडे हा फोटो पोहोचल्याची माहिती सूत्रांनी दिली आहे. अद्याप कुणालाही अटक करण्यात आलेली असून चौकशी केली जात आहे.



  Print






News - Nagpur | Posted : 2019-10-20






Related Photos