Petrol Price
गोल पुलिया रस्त्याची खासदार प्रतिभा धानोरकरांकडून पाहणी : नगर परिषदेत विविध विषयांवर चर्चा
विदर्भ न्यूज एक्सप्रेस
तालुका प्रतिनिधी / बल्लारपूर : खासदार प्रतिभाताई धानोरकर यांनी २८ सप्टेंबर रोजी बल्लारपूर नगर परिषदेला सदिच्छा भेट देत शहरातील विविध विकासकामे आणि नागरिकांच्या समस्यांबाबत सविस्तर चर्चा केली. यावेळी नगर परिषद प्रशासन व पदाधिकाऱ्यांकडून शहरातील विविध विषयांची माहिती घेण्यात आली.
नगर परिषदेत आगमन झाल्यानंतर नगराध्यक्षा अल्का वाढई यांनी खासदार प्रतिभा धानोरकर यांचे स्वागत केले. यावेळी नगर परिषद उपाध्यक्ष देवेंद्र आर्य, गटनेते अब्दुल करीम, नगरसेवक इस्माईल ढाकवाला, पवन मेश्राम, स्वीकृत नगरसेवक भास्कर माकोडे, नगरसेविका वैशाली हुमणे, शिल्पा चुटे यांच्यासह नगर परिषदेतील पदाधिकारी व सदस्य उपस्थित होते.
भेटीदरम्यान बल्लारपूर शहरातील विविध विकासकामे, नागरिकांच्या समस्या तसेच आवश्यक असलेल्या पायाभूत सुविधांबाबत चर्चा करण्यात आली. स्थानिक पातळीवरील समस्या जाणून घेत त्यावर योग्य तोडगा काढण्यासाठी समन्वयाने प्रयत्न करण्यावर यावेळी भर देण्यात आला.
दरम्यान, खासदार प्रतिभा धानोरकर यांनी गोल पुलिया (वस्ती) परिसरातील रस्त्याची प्रत्यक्ष पाहणी केली. या रस्त्याच्या सद्यस्थितीची पाहणी करून त्यांनी स्थानिक नागरिकांकडून रस्त्याच्या समस्येबाबत माहिती जाणून घेतली. परिसरातील नागरिकांना येणाऱ्या अडचणी आणि रस्त्याची प्रत्यक्ष परिस्थिती समजून घेत संबंधित विषयाकडे लक्ष देण्याची भूमिका त्यांनी घेतली.
नागरिकांच्या समस्या केवळ कागदोपत्री नोंदविण्याऐवजी त्यांची प्रत्यक्ष पाहणी करून परिस्थिती समजून घेणे आणि त्या सोडविण्यासाठी सकारात्मक प्रयत्न करणे, हा विकासाचा महत्त्वाचा मार्ग असल्याचे यावेळी अधोरेखित झाले. खासदारांच्या प्रत्यक्ष पाहणीमुळे गोल पुलिया परिसरातील रस्त्याच्या समस्येकडे प्रशासनाचेही लक्ष वेधले गेले आहे.
शहरातील मूलभूत सुविधा आणि नागरिकांच्या दैनंदिन अडचणी सोडविण्यासाठी नगर परिषद तसेच लोकप्रतिनिधींमध्ये समन्वय राहणे आवश्यक असून, या भेटीमुळे विविध स्थानिक प्रश्नांवर पुढील काळात सकारात्मक कार्यवाही होण्याची अपेक्षा व्यक्त केली जात आहे.
