Petrol Price
गडचिरोली पोलीस दलाच्या वतीने पत्रकार बांधवांसाठी वार्तालाप माध्यम परिषदेचे आयोजन
- पोलीस दल आणि पीआयबी नागपूरच्या संयुक्त विद्यमाने वार्तालाप परिषद; संदीप पाटील यांच्यासह वरिष्ठ अधिकारी व तज्ज्ञांचा सहभाग
- माओवादविरोधी अभियानाचा प्रवास, यशस्वी रणनीती आणि भविष्यातील आव्हानांवर सविस्तर चर्चा
विदर्भ न्यूज एक्सप्रेस
प्रतिनिधी / गडचिरोली : गडचिरोली जिल्ह्यातील माओवाद संपुष्टात आल्याच्या पार्श्वभूमीवर माओवादाची सद्यस्थिती, त्यामागील सामाजिक, राजकीय व भौगोलिक कारणे, माओवादविरोधी अभियानाचा प्रवास आणि भविष्यातील आव्हाने याबाबत वस्तुनिष्ठ माहिती पत्रकारांपर्यंत पोहोचविण्याच्या उद्देशाने गडचिरोली पोलीस दल आणि भारत सरकारचे पत्र व माहिती कार्यालय (पीआयबी), नागपूर यांच्या संयुक्त विद्यमाने पत्रकारांसाठी विशेष वार्तालाप परिषदेचे आयोजन करण्यात आले. ४ नोव्हेंबर २०२६ रोजी पोलीस मुख्यालय परिसरातील एकलव्य हॉल येथे माओवादमुक्त भारत या विषयावर आयोजित या परिषदेत वरिष्ठ पोलीस अधिकारी, माओवाद विषयाचे अभ्यासक, तज्ज्ञ आणि जिल्ह्यातील पत्रकार सहभागी झाले होते.
या परिषदेत विशेष पोलीस महानिरीक्षक, नक्षलविरोधी अभियान, नागपूर संदीप पाटील यांनी आभासी माध्यमातून सहभाग घेतला. पोलीस उपमहानिरीक्षक योगेश कुमार आणि पोलीस अधीक्षक एम. रमेश यांच्यासह वरिष्ठ पोलीस अधिकारी उपस्थित होते. तसेच ज्येष्ठ लेखक व पॉलिसी ॲनालिस्ट पी. व्ही. रामना आणि ज्येष्ठ पत्रकार कार्तिक लोखंडे यांनी माओवादाच्या विविध पैलूंवर आपले अनुभव व अभ्यासपूर्ण निरीक्षणे मांडली.
चर्चेदरम्यान माओवादाची उत्पत्ती, विस्तार, विचारसरणी, माओवाद्यांची कार्यपद्धती आणि सद्यस्थिती यांचा सविस्तर आढावा घेण्यात आला. माओवादविरोधी अभियान राबविताना सुरक्षा यंत्रणांना आलेली आव्हाने, अभियानासाठी आखण्यात आलेल्या विविध रणनीती, पोलीस दलाचे योगदान आणि स्थानिक नागरिकांचा सहभाग यावरही विचारमंथन झाले. विशेष पोलीस महानिरीक्षक संदीप पाटील यांनी सशस्त्र माओवादाच्या अस्तानंतर भविष्यात पोलीस दलासमोर उभी राहणारी आव्हाने आणि आगामी काळातील कार्यदिशा याबाबत सविस्तर मार्गदर्शन केले.
पोलीस उपमहानिरीक्षक योगेश कुमार आणि पोलीस अधीक्षक एम. रमेश यांनी गडचिरोली जिल्ह्यातील माओवादविरोधी संघर्षाचा प्रवास, पोलीस दलाने स्वीकारलेल्या विविध रणनीती आणि अभियानादरम्यान आलेले अनुभव विशद केले. ज्येष्ठ लेखक व पॉलिसी ॲनालिस्ट पी. व्ही. रामना आणि ज्येष्ठ पत्रकार कार्तिक लोखंडे यांनीही माओवादी चळवळीची पार्श्वभूमी, तिचे सामाजिक परिणाम आणि या समस्येकडे व्यापक दृष्टिकोनातून पाहण्याची आवश्यकता यावर आपले विचार मांडले.
या संवादातून गडचिरोली जिल्ह्यातील माओवादविरोधी संघर्षात सुरक्षा यंत्रणांनी बजावलेली भूमिका, पोलीस दलाचे योगदान, स्थानिक नागरिकांचे सहकार्य आणि शासनाच्या विकासात्मक उपक्रमांचे महत्त्व अधोरेखित करण्यात आले. माओवादाचा प्रभाव कमी करण्यासाठी सुरक्षा अभियानासोबतच दुर्गम भागातील नागरिकांना शिक्षण, आरोग्य, रोजगार आणि मूलभूत सुविधा उपलब्ध करून देण्याच्या प्रयत्नांवरही प्रकाश टाकण्यात आला.
गडचिरोली जिल्ह्यातील माओवाद संपुष्टात आल्यानंतर शांतता व सुरक्षितता कायम राखणे आणि भविष्यातील आव्हानांना सामोरे जाणे महत्त्वाचे असल्याचे यावेळी अधोरेखित करण्यात आले. यासाठी पोलीस दल, शासन, प्रसारमाध्यमे आणि समाजातील विविध घटक यांच्यात समन्वय व सकारात्मक संवाद असणे आवश्यक असल्याचे मत व्यक्त करण्यात आले. माओवादाच्या समस्येकडे केवळ कायदा व सुव्यवस्थेचा प्रश्न म्हणून न पाहता सामाजिक, आर्थिक, शैक्षणिक आणि विकासात्मक दृष्टिकोनातूनही पाहण्याची गरज चर्चेतून मांडण्यात आली.
वार्तालाप परिषदेत पत्रकार बांधवांनी विविध प्रश्न उपस्थित करून चर्चेत सक्रिय सहभाग घेतला. वरिष्ठ पोलीस अधिकारी आणि तज्ज्ञांनी त्यांच्या प्रश्नांना उत्तरे देत माओवादविरोधी अभियानातील अनुभव, यशस्वी कार्यपद्धती आणि आगामी आव्हानांबाबत माहिती दिली. या उपक्रमामुळे पत्रकारांना माओवादाच्या समस्येची वस्तुनिष्ठ माहिती मिळण्यासोबतच नक्षलमुक्त भारताच्या दिशेने सुरू असलेल्या प्रयत्नांची पार्श्वभूमी, सद्यस्थिती आणि आगामी वाटचाल जाणून घेण्याची संधी मिळाली.
या कार्यक्रमाच्या माध्यमातून माओवादविरोधी अभियानात आपल्या प्राणांची आहुती देणाऱ्या २१४ शहीद जवानांच्या स्मृतींना अभिवादन करण्यात आले. त्यांच्या बलिदानाचे स्मरण करून जिल्ह्यात शांतता व सुरक्षितता प्रस्थापित करण्यासाठी पोलीस दलाने केलेल्या कार्याला उजाळा देण्यात आला.
या प्रसंगी विशेष पोलीस महानिरीक्षक (नक्षलविरोधी अभियान), नागपूर संदीप पाटील हे आभासी माध्यमातून उपस्थित होते. तसेच पोलीस उपमहानिरीक्षक योगेश कुमार, पोलीस अधीक्षक एम. रमेश, अपर पोलीस अधीक्षक (अभियान) कार्तिक मधीरा, अपर पोलीस अधीक्षक (प्रशासन) गोकुल राज जी., ज्येष्ठ लेखक व पॉलिसी ॲनालिस्ट पी. व्ही. रामना, ज्येष्ठ पत्रकार कार्तिक लोखंडे, भारत सरकारच्या पत्र व माहिती कार्यालय, नागपूरचे सौरभ खेकडे व देवप्रकाश दुबे यांच्यासह गडचिरोली जिल्ह्यातील अनेक पत्रकार बांधव उपस्थित होते.
माओवादविरोधी संघर्षातील अनुभवांची देवाणघेवाण, वस्तुनिष्ठ माहितीचे प्रसारण आणि भविष्यातील शांतता, सुरक्षितता व विकासासाठी प्रशासन आणि प्रसारमाध्यमांमध्ये समन्वय निर्माण करण्याच्या दृष्टीने ही वार्तालाप परिषद महत्त्वपूर्ण ठरली.
