महत्वाच्या बातम्या

गणेशोत्सवात ध्वनिक्षेपक व ध्वनिवर्धक वापरासाठी तीन दिवस निश्चित

विदर्भ न्यूज एक्सप्रेस

प्रतिनिधी / चंद्रपूर : केंद्र शासनाच्या ध्वनी प्रदुषण (नियमन व नियंत्रण) सुधारित नियम २०१७ अन्वये तसेच ध्वनी प्रदूषण(नियमन व नियंत्रण) नियम, २००० च्या नियम ५(३)नुसार, ध्वनिक्षेपक व ध्वनीवर्धक यांचा श्रोतगृहे, सभागृहे, सामूहिक सभागृहे आणि मेजवानी कक्ष यासारख्या बंद जागाखेरीज इतर ठिकाणी, ध्वनीची विहित मर्यादा राखून सकाळी ६ वाजेपासून ते रात्री १२ वाजेपर्यंत वापर करण्यासाठी, संपूर्ण चंद्रपूर जिल्ह्याकरीता सन-२०२३ मधील १० सवलतीचे दिवस निश्चित करण्यात आले आहे. त्यापैकी ५ दिवस राखीव ठेवण्यात आले आहे. निश्चित करण्यात आलेल्या १० दिवसांपैकी ३ दिवस गणेश उत्सवाकरीता (अनंत चतुर्दशी हा दिवस धरून) निश्चित करण्यात आले आहे.

गणेश उत्सवा करीता ध्वनिक्षेपक व ध्वनिवर्धक वापरासाठी यापूर्वी निश्चित अनंत चतुर्दशी २८ सप्टेंबर हा सवलतीचा दिवस व उर्वरित २७ व २९ सप्टेंबर २०२३ हे दोन दिवस निश्चित करण्यात आले आहे. निश्चित करण्यात आलेल्या सवलतीच्या दिवशी सक्षम प्राधिकाऱ्याकडून परवानगी घेऊनच त्यांनी ठरवून दिलेल्या अटी व शर्ती प्रमाणेच ध्वनिक्षेपक व ध्वनीवर्धकाचा वापर करता येईल, असे जिल्हा दंडाधिकारी विनय गौडा यांनी निर्गमित केलेल्या आदेशात नमूद आहे.