माजी आमदार हरीराम वरखडे यांचा काॅंग्रेसमध्ये प्रवेश


- आरमोरी न.प.च्या आगामी निवडणूकीच्या पार्श्वभूमीवर राजकीय उलथापालथ
विदर्भ न्यूज एक्सप्रेस
प्रतिनिधी / गडचिरोली
: आरमोरी विधानसभा क्षेत्राचे माजी आमदार तथा राकाॅंचे प्रदेश उपाध्यक्ष हरीराम वरखडे यांनी काॅंग्रेस पक्षात प्रवेश केल्याने आगामी आरमोरी नगर परिषदेच्या निवडणूकीच्या पार्श्वभूमीवर राजकीय उलथापालथ होत असल्याच्या चर्चांना उधाण आले आहे. ब्रम्हपुरी येथे काल ७ डिसेंबर रोजी नगर परिषद निवडणूकीच्या प्रचार सभेप्रसंगी काॅंग्रेसच्या नेत्यांच्या उपस्थितीत वरखडे यांनी काॅंग्रेसमध्ये प्रवेश केला आहे.
याप्रसंगी महाराष्ट्र प्रदेश काॅंग्रेस कमिटीचे प्रवक्ता अतुल लोंढे, विधानसभेचे उपगटनेते तथा प्रदेश उपाध्यक्ष आमदार विजय वडेट्टीवार माजी आमदार देवराव भोंडेकर, माजी आमदार उपेंद्र शेंडे, माजी आमदार आनंदराव गेडाम, देसाईगंजचे माजी नगराध्यक्ष जेसा मोटवानी, काॅंग्रेसचे चंद्रपूर जिल्हाध्यक्ष प्रकाश देवतळे, इश्वर कुमरे, संजय गुंरू, हरीष मोटवानी, सुदाम मोटवानी, नंदु खानदेशकर, बबनराव तायवाडे, ब्रम्हपुरी नगर परिषदेच्या काॅंग्रेसच्या नगराध्यक्ष पदाच्या उमेदवार रिताताई दीपक उराडे उपस्थित होत्या.
आरमोरी नगर परिषदेच्या आगामी निवडणूकीच्या पाश्र्वभूमीवर हरीराम वरखडे हे काॅंग्रेसच्या संपर्कात होते. देसाईगंजचे माजी नगराध्यक्ष जेसा मोटवानी हे याबाबत प्रदेशाध्यक्ष अशोक चव्हाण, माजी खासदार नाना पटोले, आमदार विजय वडेट्टीवार यांच्या संपर्कात होते. अखेर काल ७ डिसेंबर रोजी हरीराम वरखडे यांनी काॅंग्रेसमध्ये रितसर प्रवेश घेतला आहे. माजी आमदार वरखडे हे शिवसेनेच्या तिकीटावर विधानसभेची निवडणूक लढवून आमदार झाले होते. यानंतर त्यांनी काॅंग्रेसमध्ये प्रवेश घेतला होता. काही काळानंतर त्यांनी काॅंग्रेस सोडून राष्ट्रवादी काॅंग्रेस पक्षात प्रवेश केला होता. आता पुन्हा त्यांनी काॅंग्रेसमध्ये प्रवेश केल्याने अनेकांच्या भुवया उंचावल्या आहेत.

 



  Print






News - Gadchiroli | Posted : 2018-12-08






Related Photos