महत्वाच्या बातम्या

५ ऑगस्टला कामठी तर ६ ऑगस्टला वानाडोंगरी येथे रोजगार मेळावा

विदर्भ न्यूज एक्सप्रेस
प्रतिनिधी / नागपूर : जिल्ह्यातील बेरोजगार उमेदवारांना रोजगाराच्या संधी उपलब्ध करुन देण्यासाठी जिल्हा कौशल्य विकास, रोजगार व उद्योजकता मार्गदर्शन केंद्र, नागपूर या कार्यालयाच्या वतीने पंडित दीनदयाल उपाध्याय रोजगार मेळाव्याचे आयोजन करण्यात येत असते. त्याअनुषंगाने जिल्हा कौशल्य विकास, रोजगार व उद्योजकता मार्गदर्शन केंद्र, नागपूर विद्यापीठ व सेठ केसरीमल पोरवाल कॉलेज कामठी यांचे संयुक्त विद्यमाने ५ ऑगस्ट रोजी सेठ केसरीमल पोरवाल कॉलेज, कामठी येथे करण्यात आले आहे.

जिल्हा कौशल्य विकास, रोजगार व उद्योजकता मार्गदर्शन केंद्र, तसेच मॉडेल करीअर सेंटर, नागपूर यांचे संयुक्त विद्यमाने ६ ऑगस्ट रोजी पंडित दीनदयाल उपाध्याय रोजगार मेळाव्याचे आयोजन दत्ता मेघे वैद्यकीय महाविद्यालय, हिंगणारोड, वानाडोंगरी येथे करण्यात येणार आहे.

या मेळाव्यात नामांकिंत कंपन्यांचा सहभाग राहणार असून त्यामध्ये दहावी, बारावी, पदवी, पदव्युत्तर, डिप्लोमा इत्यादी पात्रताधारक उमेदवारांच्या प्रत्यक्ष मुलाखती घेवून उमेदवारांची प्राथमिक निवड केली जाणार आहे. याव्दारे जिल्ह्यातील उमेदवारांना रोजगाराच्या विविध संधी उपलब्ध होणार आहेत. तसेच या कार्यालयाअंतर्गत मुख्यमंत्री युवा कार्य प्रशिक्षण योजना, प्रधानमंत्री इंटर्नशिप योजनेअंतर्गत देखील अंतिम वर्षातील(Last Year) मुलांना देखील प्रशिक्षणाच्या (इंटर्नशिप) संधी उपलब्ध होणार आहेत.

तरी जास्तीत -जास्त उमेदवारांनी सदर रोजगार मेळाव्यास उपस्थित राहून रोजगार मेळाव्यांचा लाभ घ्यावा, असे आवाहन सहायक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्र, नागपूर यांनी केले आहे.