महत्वाच्या बातम्या

गडचिरोली पोलीस दलाच्या वतीने मौजा भामरागड येथील आठवडी बाजारादरम्यान आरोग्य शिबिराचे करण्यात आले आयोजन

- या अभिनव उपक्रमादरम्यान पोस्टे भामरागड हद्दीतील एकूण १०४ नागरिकांची तज्ञ वैद्यकीय पथकाकडून तपासणी

- पोलीस रुग्णालय गडचिरोली, जिल्हा सामान्य रुग्णालय गडचिरोली, जिल्हा परिषद गडचिरोली यांच्या संयुक्त विद्यमाने राबविण्यात आला उपक्रम

- आरोग्य शिबिरादरम्यान फिरत्या प्रदर्शनीच्या माध्यमातून शहीद जवानांचे बलिदान व पोलीस दलाच्या कार्याबद्दल करण्यात आली जनजागृती

विदर्भ न्यूज एक्सप्रेस
प्रतिनिधी / गडचिरोली : गडचिरोली पोलीस दलाकडून जिल्ह्रातील नागरिकांसाठी वेळोवेळी विविध कल्याणकारी उपक्रम राबविले जात असतात. जिल्ह्रामधील अतिदुर्गम भागातील नागरिकांपर्यंत देखील आरोग्य सेवा पोहचविण्याच्या उद्देशाने गडचिरोली पोलीस दलाकडून विविध आरोग्य मेळावे आयोजित केले जात असतात.

याच उपक्रमांचा एक भाग म्हणून गडचिरोली पोलीस दलाच्या वतीने आज ०६ मे २०२६ रोजी पोलीस रुग्णालय गडचिरोली, जिल्हा सामान्य रुग्णालय गडचिरोली, जिल्हा परिषद गडचिरोली यांच्या संयुक्त विद्यमाने मौजा भामरागड येथील आठवडी बाजार परिसरात मोफत आरोग्य तपासणी शिबिराचे आयोजन करण्यात आले होते.

अतिदुर्गम भागातील नागरिकांमध्ये आरोग्य सुविधांविषयी जनजागृती करुन नागरिकांना विविध आरोग्य तपासणी आणि औषधोपचार मिळवून देण्याच्या उद्देशाने पोलीस अधीक्षक गडचिरोली एम. रमेश यांच्या मार्गदर्शनाखाली सदर आरोग्य शिबिराचे आयोजन करण्यात आले होते. या शिबिरामध्ये डॉ. खंडेलवाल (स्त्रिरोगतज्ञ), पोलीस रुग्णालय गडचिरोलीचे वैद्यकीय अधिकारी डॉ. रोशन गिरसावळे, डॉ. रोशनी किरंगे, चारुलता दुर्गे (परिचारीका) यांचे नेतृत्वात नागरिकांची आरोग्य तपासणी करण्यात आली.

सदर मेळाव्यादरम्यान हद्दीतील सुमारे १०४ नागरिकांची विविध आजारांबाबत तपासणी करून आवश्यकतेनूसार नागरिकांना मोफत औषधे उपलब्ध करुन देण्यात आली तसेच विविध आजारांविषयी व पोषण समस्यांविषयी मार्गदर्शन करण्यात आले. यावेळी एकूण १९ नागरिकांना आवश्यकतेनूसार विविध रुग्णालयांच्या ठिकाणी पुढील तपासणीसाठी शिफारस केलेली आहे.

तसेच स्त्रिरोग तज्ञांकडून महिलांची तपासणी करण्यात येऊन आवश्यक मार्गदर्शन करण्यात आले आहे. गडचिरोली पोलीस दलाच्या वतीने सन २०२१ पासून आजपावेतो एकूण १९७ आरोग्य मेळाव्यांच्या माध्यमातून जवळ-जवळ एकूण ४२ हजार ५०० हजार पेक्षा अधिक नागरिकांची आरोग्य तपासणी केलेली आहे.

तसेच एकूण ०५ रक्तदान शिबिरांच्या माध्यमातून एकूण ४ हजार ३६१ युनिट रक्ताचे संकलन करण्यात आले आहे. यासोबतच ऑपरेशन रोशनीच्या माध्यमातून एकूण ९ हजार ९७१ पेक्षा अधिक नागरिकांची नेत्र तपासणी करुन एकूण १ हजार ४१२ नागरिकांची मोफत मोतीबिंदू शस्त्रक्रिया करण्यात आलेली आहे. यासोबतच गडचिरोली पोलीस दलाच्या वतीने गडचिरोली जिल्ह्रात कार्यरत असतांना शहीद जवानांनी दिलेल्या बलिदानाबद्दल, सी-६० जवानांच्या शौर्याबद्दल व नागरी कृती उपक्रमांबद्दल आठवडी बाजारात उपस्थित नागरिकांना विविध बॅनरच्या माध्यमातून माहिती देण्यात येऊन जनजागृती करण्यात आली.

सदर आरोग्य शिबिराचे आयोजन पोलीस अधीक्षक गडचिरोली एम. रमेश, मुख्य कार्यकारी अधिकारी जि. प. गडचिरोली सुहास गाडे, अपर पोलीस अधीक्षक (अभियान) कार्तिक मधिरा, अपर पोलीस अधीक्षक (प्रशासन) गोकुल राज जी.,पोलीस उप-अधीक्षक (अभियान) विशाल नागरगोजे तसेच उपविभागीय पोलीस अधिकारी भामरागड अमर मोहिते यांच्या मार्गदर्शनाखाली पोस्टे भामरागडचे पोउपनि. दत्ता उजेे व पोलीस अंमलदार यांनी यशस्वीरित्या पार पाडले.