महत्वाच्या बातम्या

दोहा येथे अरब-इस्लामिक शिखर संमेलन : ५० हून अधिक मुस्लीम देश एकत्र

विदर्भ न्यूज एक्सप्रेस
वृत्तसंस्था / दोहा : कतारची राजधानी दोहा येथे मोठ्या अरब-इस्लामिक शिखर संमेलनाचे आयोजन करण्यात आले असून यात ५० पेक्षा अधिक मुस्लीम देश सहभागी होणार आहेत. इस्रायली हल्ल्यानंतर प्रथमच इतक्या मोठ्या संख्येने मुस्लीम राष्ट्रे एका व्यासपीठावर एकवटणार असल्याने या परिषदेचे महत्त्व वाढले आहे. हे संमेलन केवळ इस्रायलच नव्हे तर अमेरिकेलाही चिंतेत टाकणारे ठरू शकते.

गाझा व दोहा हल्ल्यानंतर संतापाचे वातावरण -
गाझा येथील इस्रायली हल्ल्यामुळे अनेक मुस्लीम देशांमध्ये आधीच नाराजी आहे. त्यातच दोहा येथे झालेल्या हल्ल्यानंतर परिस्थिती अधिकच तणावपूर्ण झाली आहे. संयुक्त राष्ट्र परिषदेत पाकिस्तानचे नाव घेत इस्रायलने केलेल्या संतप्त भूमिकेमुळे इतर देशांमध्ये अस्वस्थता निर्माण झाली आहे. या घडामोडींमुळे अमेरिकेच्या समर्थनार्थ उभ्या असलेल्या अरब राष्ट्रांच्या एकजुटीला धक्का बसला आहे.

अरब लीगचा ठाम इशारा -
हे आपत्कालीन शिखर संमेलन अरब लीग आणि इस्लामिक सहयोग संघटनेच्या (OIC) सदस्यांना एकाच व्यासपीठावर आणणारे आहे. अरब लीगचे महासचिव अहमद अबुल गैन यांनी एका मुलाखतीत स्पष्ट केले की, कतार एकटा नाही; अरब आणि इस्लामी देश त्याच्या पाठीशी ठामपणे उभे आहेत.

नेतन्याहूंचा दबाव कायम -
९ सप्टेंबरच्या हल्ल्याच्या निषेधानंतर इस्रायली पंतप्रधान बेंजामिन नेतन्याहू यांनी कतारवर दबाव वाढवला आहे. दोहामध्ये हमास नेत्यांची उपस्थिती असल्याचे कारण देत त्यांनी हमास अधिकाऱ्यांना हटवा, अन्यथा आरोपीच्या पिंजऱ्यात ठेवा असा इशारा दिला. कतारने गेली दोन वर्षे गाझा युद्ध संपवण्यासाठी प्रयत्न केले असले तरी, हल्ल्यानंतर कतारने इस्रायलवरच शांततेला अडथळा आणल्याचा आणि हिंसाचार वाढवल्याचा आरोप केला आहे.

ट्रम्पची नाराजी -
कतारवरील हल्ल्यानंतर अमेरिकेचे राष्ट्राध्यक्ष डोनाल्ड ट्रम्प यांनी नाराजी व्यक्त केली आहे. कतार हा अमेरिकेचा जवळचा मित्र असून तो शांततेसाठी प्रयत्नशील आहे, असे ते म्हणाले. दरम्यान, कतारचे अमीर शेख तमीम बिन हमद अल थानी यांनी त्यांच्या भूमीवर अशा घटना पुन्हा घडू नयेत, असे स्पष्ट केले. दुसरीकडे, इस्रायलने कतारने आपल्या भूमीतून हमास नेते हटवावेत, अशी मागणी पुन्हा केली आहे.