कारागृह कैदी कौशल्य विकास दीक्षांत समारोह संपन्न
- 33 बंद्यास प्रमाणपत्राचे वाटप
विदर्भ न्यूज एक्सप्रेस
प्रतिनिधी / नागपूर : आझादी का अमृत महोत्सवानिमित्त प्रधानमंत्री कौशल्य विकास योजना, टेक्सटाईल सेक्टर, स्कील इंडिया, भारत सरकार, महाराष्ट्र राज्य कौशल्य विकास सोसायटी व जिल्हा कौशल्य विकास रोजगार व उद्योजकता मार्गदर्शन केंद्राच्या संयुक्त विद्यमाने संकल्प प्रकल्पांतर्गत नागपूर मध्यवर्ती कारागृतील बंद्यांसाठी यंत्रमाग व हातमाग विभागातील 40 बंद्यांना आर.पी.एल.चे प्रत्येक विभागासाठी तीन दिवसाचे प्रशिक्षण आयोजन करण्यात आले होते. या प्रशिक्षणात कौशल्य प्राप्त केलेल्या बंद्यांचा दीक्षात समारोहाचे आयोजन नुकताच करण्यात आला.
प्रशिक्षणार्थ्यासाठीचा दीक्षांत समारोह जिल्हाधिकारी तथा कौशल्य विकास कार्यकारी समिती अध्यक्ष डॉ. विपीन इटनकर यांच्या मार्गदर्शनाखाली तसेच जिल्हा परिषदेचे मुख्य कार्यकारी अधिकारी योगेश कुंभेजकर यांच्या प्रमुख उपस्थितीत पार पडला. यावेळी कौशल्य प्राप्त एकूण 33 बंद्यांना स्कील इंडिया, भारत सरकार, प्रधानमंत्री कौशल्य विकास योजना या संस्थेचे प्रमाणपत्र वितरण करण्यात आले.
मुख्य कार्यकारी अधिकारी योगेश कुंभेजकर यांनी बंद्यांना प्रशिक्षणाचे तसेच प्रमाणपत्राचे महत्व यावेळी समजावून सांगितले. त्यासोबतच बंद्यांसाठी अशाच प्रकारचे वेगवेगळे प्रशिक्षण जिल्हा कौशल्य विकास व संकल्पद्वारे आयोजित करण्याबाबत मार्गदर्शन केले.
मार्गदर्शनपर भाषणात उपअधीक्षक दिपा आगे यांनी यंत्रमाग विभाग व हातमाग विभाग प्रशिक्षण घेतल्यामुळे बंद्यांना नवी कौशल्य व आधूनिक काळासमोरील तांत्रिक आव्हाने तसेच त्यासंबंधित तांत्रिक माहिती मिळाल्यामुळे बंद्यामध्ये सकारात्मक उर्जा निर्माण झालेली असून, प्रशिक्षण घेतलेल्या बंद्याच्या कामामध्ये सुधारणा होवून कापड उत्पादन अधिक चांगल्याप्रकारे होणास कारागृह प्रशासनास मदत मिळत आहे, असे त्यांनी सांगितले.
बंदी कारागृहातून सुटल्यानंतर सदर प्रमाणपत्राच्या आधारे राष्ट्रीयकृत बँकेमार्फत त्यांना कर्ज उपलब्ध होण्यास मदत होणार असून त्या माध्यमातून त्यांचे पुनर्वसन होण्यासाठी हातभार लागणार आहे. वर्तमानात उपलब्ध असलेल्या वस्त्रौद्योग विभागातील विणकाम संबंधित यंत्रमाग व शटललूम वरती पावरलूम ऑपरेटर म्हणून त्यांना रोजगाराची संधी उपलब्ध होण्यास मदत होईल, असा विश्वास त्यांनी व्यक्त केला.
कार्यक्रमाचे प्रस्ताविक जिल्हा कौशल्य विकास विभागाचे सहायक आयुक्त प्रभाकर हरडे यांनी केले. संचालन गांधी रिसर्च फेलो नागपूरचे लक्ष्मण साळवे यांनी केले तर उपस्थितांचे आभार उपअधीक्षक दिपा आगे यांनी मानले. या कार्यक्रमास वरिष्ठ तुरंगाधिकारी वामन निमजे, आनंद पानसरे, देवराव आडे, अमोल वानखडे, तुरुंगाधिकारी संजीव हटवादे, जिल्हा कौशल्य विकास समन्वयक मनीष कुंदळे, शिक्षक योगेश कुंटे उपस्थित होते.
News - Nagpur