जात प्रमाणपत्र पडताळणी प्रक्रिया पूर्णपणे ऑनलाईन अर्जातील माहिती तपासलेली व अचूक असावी

विदर्भ न्यूज एक्सप्रेस
प्रतिनिधी / नागपूर : सामाजिक न्याय व विशेष सहाय्य विभागाची जिल्हा जात प्रमाणपत्र पडताळणी समितीकडून संबंधितांच्या जात प्रमाणपत्र पडताळणीची प्रक्रिया पूर्ण करून त्याबाबत प्रमाणपत्र उपलब्ध करून देण्यात येते. तथापि, ऑक्टोबर २०२६ पासून जात प्रमाणपत्र पडताळणीची कार्यप्रणाली नव्याने विकसित करण्यात आली असल्याचे समितीकडून कळवण्यात आले आहे.
त्यानुसार अर्जदारांनी ऑनलाईन अर्ज केल्यानंतर प्रत्यक्ष उपस्थित राहून अर्ज सादर करण्याची तसेच त्रुटी पूर्ततेसाठी कार्यालयात प्रत्यक्ष येण्याची आवश्यकता उरलेली नाही. मात्र, ऑनलाईन अर्ज तपासणीदरम्यान अर्जदारांकडून काही सामान्य चुका होत असल्याचे निदर्शनास आले आहे. त्यामुळे अर्जदारांनी अर्ज भरताना योग्य ती दक्षता घ्यावी, असे आवाहन जिल्हा जात प्रमाणपत्र पडताळणी समितीचे उपायुक्त तथा सदस्य डॉ. मंगेश वानखडे यांनी केले आहे.
जात प्रमाणपत्र पडताळणीकरिता ऑनलाईन अर्ज भरताना अर्जदाराने आपली प्राथमिक माहिती उपलब्ध जात प्रमाणपत्रानुसार अचूक भरावी. अर्जदाराने स्वतःचे, वडिलांचे आणि आडनावाचे स्पेलिंग जात प्रमाणपत्रात अचूक लिहावे.
वडिलांच्या नावासमोर राव, जी इ. शब्द जात प्रमाणपत्रात नमूद असतील तरच ते लिहावेत, अन्यथा लिहू नयेत. जात प्रमाणपत्रावरील रेव्हेन्यू केस नं. व एमआरसी नं. यांची माहिती अचूक नोंदवावी.जात प्रमाणपत्र निर्गमित केल्याचा दिनांक तसेच प्रमाणपत्र निर्गमित करणाऱ्या अधिकाऱ्याचे पदनाम, शहर आणि तहसीलची माहिती भरणे आवश्यक आहे.
ही सर्व माहिती थेट जात वैधता प्रमाणपत्रावर मुद्रित होत असल्याने, नावात किंवा स्पेलिंगमध्ये चूक झाल्यास शिक्षणात किंवा प्रवेशाच्या वेळी अडचण निर्माण होऊ शकते. ऑनलाईन अर्ज करताना सर्व कागदपत्रे मूळ आणि स्पष्ट व वाचनीय स्वरूपातच अपलोड करावीत. अर्जाच्या ज्या रकान्यात जी कागदपत्रे मागितली आहेत, त्यातच ती अपलोड करावीत.
जात वैधता प्रमाणपत्रावर येणारा अर्जदाराचा फोटो हा नजीकच्या काळात काढलेला असावा. अर्जदारांनी ऑनलाईन अर्ज करताना वरील सर्व बाबींची स्वतः खात्री करून आपली माहिती अत्यंत काळजीपूर्वक व अचूक भरावी, असे आवाहन उपायुक्त तथा समितीचे सदस्य डॉ. मंगेश वानखेडे यांनी केले आहे.




Petrol Price




