Petrol Price
६.४९ कोटींच्या निधीतून श्री छत्रपती शिवाजी महाराज क्रीडांगणाचा कायापालट : उद्घाटनाच्या प्रतीक्षेत भव्य स्टेडियम
विदर्भ न्यूज एक्सप्रेस
तालुका प्रतिनिधी / बल्लारपूर : शहरातील कॉलरी ग्राउंड परिसरात असलेल्या श्री छत्रपती शिवाजी महाराज क्रीडांगणाचा चेहरामोहरा आता बदलला आहे. परिसरातील नागरिकांची अनेक वर्षांपासून असलेली सुसज्ज क्रीडांगणाची मागणी लक्षात घेऊन आमदार सुधीर मुनगंटीवार यांनी पुढाकार घेत निधी उपलब्ध करून दिला. त्यांच्या प्रयत्नातून तब्बल ६ कोटी ४९ लाख रुपयांच्या निधीतून भव्य स्टेडियमचे काम पूर्ण झाले असून, हे क्रीडांगण आता उद्घाटनाच्या प्रतीक्षेत आहे.
कॉलरी ग्राउंड हे परिसरातील नागरिकांसाठी खेळ, व्यायाम आणि विविध सामाजिक उपक्रमांचे महत्त्वाचे ठिकाण आहे. मात्र, येथे आधुनिक सुविधांनी युक्त क्रीडांगण नसल्याने खेळाडू आणि नागरिकांना अनेक अडचणींचा सामना करावा लागत होता. परिसरातील नागरिकांकडून या मैदानाच्या विकासाची मागणी सातत्याने केली जात होती. नागरिकांची ही गरज ओळखून आमदार सुधीर मुनगंटीवार यांनी या क्रीडांगणाच्या विकासासाठी पुढाकार घेतला आणि निधी उपलब्ध करून दिला.
या निधीतून क्रीडांगणाचे आधुनिक स्वरूपात रूपांतर करण्यात आले आहे. नव्याने विकसित करण्यात आलेल्या स्टेडियममुळे परिसरातील खेळाडूंना सरावासाठी चांगली सुविधा उपलब्ध होणार आहे. विशेष म्हणजे, केवळ खेळाडूंचाच विचार न करता सर्वसामान्य नागरिकांच्या आरोग्याचीही काळजी घेण्यात आली आहे. नागरिकांना सकाळी आणि सायंकाळी पायदळ चालता यावे, यासाठी स्वतंत्र वॉकिंग ट्रॅक तयार करण्यात आला आहे. त्यामुळे ज्येष्ठ नागरिक, महिला, युवक तसेच आरोग्याबाबत जागरूक असलेल्या नागरिकांना नियमित व्यायामासाठी हक्काचे ठिकाण उपलब्ध होणार आहे.
या क्रीडांगणामुळे परिसरातील क्रीडा संस्कृतीला चालना मिळण्यासोबतच स्थानिक खेळाडूंना आपल्या कौशल्याचा विकास करण्यासाठी चांगले व्यासपीठ मिळणार आहे. तसेच नागरिकांना मोकळ्या आणि विकसित परिसरात व्यायाम करण्याची संधी उपलब्ध होणार आहे. ६ कोटी ४९ लाख रुपयांच्या निधीतून साकारलेले हे स्टेडियम आता पूर्णत्वास आले असून, नागरिक आणि क्रीडाप्रेमींचे लक्ष त्याच्या उद्घाटनाकडे लागले आहे. अनेक दिवसांपासून प्रतीक्षेत असलेले हे आधुनिक क्रीडांगण लवकरच नागरिकांसाठी खुले होणार का, याकडे परिसरातील नागरिकांचे लक्ष लागले आहे.
