‘नासा’ कडून इस्रोच्या दैदिप्यमान कामगिरीची दखल, भविष्यात संयुक्तरित्या काम करण्याची व्यक्त केली इच्छा


वृत्तसंस्था / बंगळुरू :  चंद्राच्या जमिनीपासून अवघ्या काही अंतराच्या उंचीवर असताना चांद्रयान-२ मोहिमेतील विक्रम लँडरशी इस्रोचा संपर्क  तुटला असला तरीही भारतीय अंतराळ संशोधन संस्थेच्या (इस्रो) चांद्रयान-२ मोहिमेचे आणि शास्त्रज्ञांच्या ध्येयवाद व चिकाटीचे जगभरातील अनेक देशांकडून, नागरिकांकडून कौतुक केले जात असून त्यांच्यावर अभिनंदनाचा वर्षाव होतोय. अशातच जगातील सर्वोच्च अंतराळ संशोधन संस्था ‘नासा’ नेही इस्रोच्या या दैदिप्यमान कामगिरीची दखल घेतली आहे. “चांद्रयान मोहिमेचा तुमचा प्रवास आमच्यासाठी प्रेरणादायी आहे”, अशा शब्दांमध्ये नासाने इस्रोचं आणि भारतीय शास्त्रज्ञांचं कौतुक केलं आहे. याशिवाय भविष्यात अंतरळामध्ये संयुक्तरित्या काम करण्याची इच्छा देखील व्यक्त केली आहे.
“अंतराळात शोधकार्य कठीण आहे…चंद्राच्या दक्षिण ध्रुवावर चांद्रयान- २  मोहिमेची लँडिंग करण्याच्या इस्रोच्या प्रयत्नांची आम्ही प्रशंसा करतो…तुम्ही तुमच्या प्रवासाने आम्हाला प्रेरणा दिली आहे…आपण भविष्यात सौर मंडळात शोध घेण्यासाठी संयुक्तपणे काम करु अशी अपेक्षा आहे…”, अशा आशयाचे ट्विट नासाने केले आहे. संयुक्त अरब अमिरातनेही इस्रोच्या प्रयत्नांचे कौतुक केले असून अवकाश क्षेत्रातील महत्त्वाचा खेळाडू असल्याचं भारताने सिद्ध केलं आहे अशा आशयाचे ट्विट केले आहे.
दरम्यान, “चांद्रयान-२ मोहिमेची ९५ टक्के उद्दिष्ट्ये साध्य झाली आहेत. लँडर चांद्रभूमीवर सुरक्षित उतरू शकले नाही, बाब गौण आहे,” अशी प्रतिक्रिया इस्रोचे माजी अध्यक्ष जी. माधवन नायर यांनी दिली आहे. तर, इस्रोच्या नियंत्रण कक्षाशी असलेला संपर्क तुटला असला तरी पुढचे १४ दिवस विक्रम लँडरशी संपर्क साधण्याचा प्रयत्न केला जाईल असे इस्रोचे प्रमुख के.सिवन यांनी स्पष्ट केले आहे.



  Print






News - World | Posted : 2019-09-08






Related Photos