महत्वाच्या बातम्या

मतदार जनजागृती अभियानांतर्गत नवमतदार नोंदणी शिबिर

विदर्भ न्यूज एक्सप्रेस

प्रतिनिधी / वर्धा : निवडणूक आयोगाने विशेष संक्षिप्त पुनरीक्षण कार्यक्रम जाहिर केला असून त्याअंतर्गत दावे व हरकती स्वीकरण्यात येत आहे. या अभियानांतर्गत वर्धा विधानसभा मतदार संघातील बजाज विज्ञान महाविद्यालय, वर्धा येथे नवमतदार नोंदणी शिबिर आयोजित करुन मतदार जनजागृती करण्यात आली.

उपविभागीय अधिकारी तथा मतदार नोंदणी अधिकारी दिपक कारंडे, तहसीलदार तथा सहाय्यक मतदार नोंदणी अधिकारी रमेश कोळपे, प्राचार्य डॉ. प्रदिप टेकाडे, समन्वय अधिकारी अंबाडकर, भोयर, महसूल सहाय्यक सचिन हटवार, मतदान केंद्रस्तरीय अधिकारी, पर्यवेक्षक यावेळी उपस्थित होते.

उपविभागीय अधिकारी कारंडे यांनी नवमतदार नोंदणी शिबिरामध्ये निवडणूक प्रक्रिया व मतदानाविषयी सविस्तर माहिती दिली. लोकशाहीच्या बळकटीकरणासाठी प्रत्येकाने मतदान करणे आवश्यक आहे. एकही पात्र युवक मतदानापासून वंचित राहू नये असे ते म्हणाले. या शिबिरामध्ये एकूण ७४ नवमतदारांची नोंदणी करण्यात आली.

४७- वर्धा विधानसभा मतदारसंघामध्ये महाविद्यालय स्तरावर मतदार जनजागृती करण्यात येत आहे. वर्धा तालुक्यातील २७ महाविद्यालय व सेलू तालुक्यातील ६ ठिकाणी नवमतदार नोंदणी व मतदार जनजागृती ३० ऑक्टोंबर पर्यंत राबविण्यात येत आहे. या शिबिरामध्ये पात्र नवमतदारांनी मतदान केंद्रस्तरीय अधिकाऱ्यांच्या माध्यमातून नाव नोंदणी किंवा नावामध्ये दुरुस्ती करुन घ्यावी. तसेच आगामी निवडणूक प्रक्रियेमध्ये सर्वांनी भाग घ्यावा, असे आवाहन जिल्हा प्रशासनातर्फे करण्यात आले आहे.