महत्वाच्या बातम्या

दिव्यांगांच्या दारी अभियानाचा मुख्य कार्यकारी अधिकाऱ्यांनी घेतला आढावा

- दिव्यांग कल्याण विभाग दिव्यांगांच्या दारी अभिमान

- अभियानांतर्गत १३ ऑक्टोंबरला दिव्यांगांसाठी शिबिर

विदर्भ न्यूज एक्सप्रेस

प्रतिनिधी / वर्धा : दिव्यांग कल्याण विभाग दिव्यांगांच्या दारी अभियानांतर्गत दिव्यांगांना एकाच छताखाली विविध शासकीय योजनांचा लाभ देण्यासाठी चरखा सभागृह, सेवाग्राम येथे १३ ऑक्टोंबर रोजी शिबिराचे आयोजन करण्यात आले आहे. या शिबिराच्या तयारीचा मुख्य कार्यकारी अधिकारी रोहन घुगे यांनी आढावा घेतला.

जिल्हा परिषदेच्या सभागृहात आयोजित आढावा बैठकीला अतिरिक्त मुख्य कार्यकारी अधिकारी सुरज गोहाड, समाज कल्याणचे सहाय्यक आयुक्त प्रसाद कुळकर्णी, जिल्हा आरोग्य अधिकारी डॉ.रा.ज.पराडकर, जिल्हा समाज कल्याण अधिकारी प्राजक्ता इंगळे, तहसीलदार रमेश कोळपे, मुख्याधिकारी राजेश भगत, गटविकास अधिकारी यांच्यासह विविध विभागांचे अधिकारी उपस्थित होते.

शिबिराच्या जनजागृतीसाठी प्रचार प्रसिध्दी सोबतच प्रत्येक गावामध्ये दवंडी देण्यात यावी. जिल्हास्तरीय शिबिरामध्ये मोठ्या संख्येने दिव्यांग बांधव येणार असून त्यांच्या पाणी व भोजनाची व्यवस्था करण्यात यावी. दिव्यांगांना शिबिराच्या ठिकाणी येण्यासाठी वर्धा बसस्थानकावरून बसेसची व्यवस्था करण्यात येणार असून बसस्थानकावर स्टॉल लावण्यात यावे. शिबिराच्या ठिकाणी स्वच्छता, पार्किंगची व्यवस्था, मोबाईल टॉयलेट, वैद्यकीय सेवा उपलब्ध करुन देण्यात यावी, अशा सूचना मुख्य कार्यकारी अधिकारी घुगे यांनी यावेळी दिल्या.

शिबिराच्या यशस्वीतेसाठी एकूण बारा समित्यांची स्थापना करण्यात आली आहे. यामध्ये जिल्हास्तरीय संनियंत्रण समिती, स्टेज व लाभार्थींना लाभ वाटप समिती, भोजन समिती, प्रचार प्रसार समिती, स्वच्छता व संबंधित इतर व्यवस्था समिती, पार्किंग व्यवस्था, वैद्यकीय सेवा समिती, वाहन व्यवस्था, नोंदणी समिती, हॉल बैठक व्यवस्था, तक्रार निवारण समितीचा समावेश आहे. यावेळी प्रत्येक समितीचा सविस्तर आढावा यावेळी घेण्यात आला.