महत्वाच्या बातम्या

बल्लारपूर : वाहनाच्या बॅटऱ्या चोरणाऱ्या टोळीला अटक

विदर्भ न्यूज एक्सप्रेस
प्रतिनिधी / बल्लारपूर : बल्लारशाह पोलीस स्टेशन अंतर्गत येणाऱ्या विसापूर येथे वाहनाच्या बॅटऱ्या चोरणाऱ्या टोळीला अटक केले. विसापुर येथील राष्ट्रसंत तुकडोजी महाराज चौकाजवळील मनोज नवले यांच्या मालकीच्या उभ्या असलेल्या ऑटो क्रमांक एम. एच ३४ बी. एच ००७५ मधून स्टेपनी व बॅटरी चोरीच्या बेतात असलेल्या तिघा चोरांना गुरुदेव भजन मंडळाच्या सतर्कतेने व वॉर्डातील युवकाच्या धाडसाने पकडून बल्लारपूर पोलिसांच्या स्वाधीन करण्यात आले. ही कारवाई सोमवारी मध्यरात्री करण्यात आली. आरोपींमध्ये जगविरसिंग हरदेवसिंग संधू वय २२ वर्ष रा. कन्नमवार वॉर्ड, बल्लारपूर व दोन अल्पवयीन मुलांचा समावेश आहे.
विसापूर येथील गुरुदेव भजन मंडळाचे सदस्य घरगुती भजन आटोपून परत येत असताना मध्यरात्री १२.३० वाजताच्या सुमारास तीन संशयित तरुण ऑटोजवळ उभे असलेले त्यांना दिसले व बाजूला बऱ्याच अंतरावर एक दुचाकी उभी दिसली. त्यामुळे ते तिथेच थांबले. त्याचवेळी ऑटोचालक मनोज नवले लघुशंकेसाठी उठले असता त्यांना त्यांच्या ऑटोची स्टेपनी हातात धरून पळून जाण्याच्या बेतात असलेले युवक दिसले.

त्यांनी आरडाओरड केली तेव्हा भजन मंडळाचे सदस्य आणि तुकडोजी चौकातील काही युवकांनी धाव घेत त्या युवकांना पकडले. याबाबत विसापूर पोलीस चौकीला माहिती देत गस्तीवर असलेल्या बल्लारपूर पोलिसांना बोलवून चोरट्यांना त्यांच्या स्वाधीन करण्यात आले. पोलिसांनी त्या तिनही चोरट्यांना अटक करून त्यांच्याविरुद्ध गुन्हा दाखल करण्यात आला आहे.

गावामध्ये मागील आठ- दहा दिवसांपूर्वी अंकुश ट्रकच्या बॅटरी चोरी गेल्या होत्या. तसेच टोलनाका येथीलही अनेक ट्रकांच्या बॅटऱ्या, डिझेल व ट्रकचे साहित्य चोरीला गेले आहे. याशिवाय बॉटनिकल गार्डनचे कंपाउंडचे लोखंडी खांबसुद्धा चोरी गेल्याची घटना घडली आहे.