राहुल गांधी राजीनाम्यावर ठाम!


वृत्तसंस्था / नवी दिल्ली :  लोकसभा निवडणुकीतील  पराभवानंतर काँग्रेस अध्यक्ष  राहुल गांधी यांनी अध्यक्षपदाचा राजीनामा देण्याचा प्रस्ताव मांडला.  राहुल गांधी हे सोमवारी, तिसऱ्या दिवशीही राजीनाम्यावर ठाम होते, तर काँग्रेस निष्ठावंतही शांत होते.  
काँग्रेसच्या दारूण पराभवानंतर झालेल्या पक्ष कार्यकारिणीच्या बैठकीत राहुल यांनी पक्षाध्यक्षपदाचा राजीनामा देऊ केला, मात्र कार्यकारिणीने तो अमान्य केला. तरीही राहुल पद सोडण्याबाबत कमालीचे आग्रही आहेत. त्यामुळे पक्षात संभ्रमावस्था असताना कर्नाटकमधील काँग्रेस आमदार रमेश जरकिहोली आणि डॉ. सुधाकर यांनी अन्य काही पक्षनेत्यांसह भाजपचे नेते एस. एम. कृष्णा यांची त्यांच्या बेंगळुरूतील निवासस्थानी रविवारी भेट घेऊन काँग्रेस सरकार पाडण्याबाबत चर्चा केल्याचे वृत्त आहे. दुसरीकडे राजस्थान काँग्रेसमध्येही अंतर्गत नाराजी उफाळून आली आहे. मुख्यमंत्री अशोक गहलोत यांनी पक्षापेक्षा आपल्या मुलाच्या निवडणुकीसाठीच जोर लावल्याच्या आरोपांच्या पार्श्वभूमीवर, या पराभवाची जबाबदारी निश्चित करून संबंधित नेत्यांवर कारवाई करावी, अशी मागणी राज्यातील अनेक मंत्रीच करू लागले आहेत. 
डित जवाहरलाल नेहरू यांच्या ५५व्या पुण्यतिथीनिमित्त सोमवारी सकाळी सोनिया गांधी यांच्यासोबत शांतीवन येथे जाऊन राहुल गांधी यांनी श्रद्धांजली वाहिली. मात्र कुणाशीही, काहीही न बोलता ते तिथून निघून गेले. ते कोणाचेही फोन घेत नसून त्यांनी सर्व कार्यक्रम रद्द केले आहेत. काही नवनिर्वाचित खासदारांना भेटण्यासही त्यांनी नकार दिला. 
 कार्यकारिणीच्या शनिवारी झालेल्या बैठकीत राहुल गांधी यांनी, काही नेत्यांनी काँग्रेसच्या विजयासाठी काम करण्यापेक्षा आपापल्या मुलांच्या निवडणुकांनाच प्राधान्य दिल्याचा आरोप केला. पण त्यांनी राजस्थानचे मुख्यमंत्री अशोक गहलोत, मध्य प्रदेशचे मुख्यमंत्री कमलनाथ किंवा ज्येष्ठ नेते पी. चिदंबरम यांचे नाव घेतले नाही, असा दावा आता या बैठकीला उपस्थित असलेले नेते करीत आहेत. आपला भाऊ एकटाच निवडणूक प्रचाराची धुरा सांभाळत होता आणि काँग्रेसच्या इतर नेत्यांनी कोणतेही योगदान दिले नाही, असा आरोप या बैठकीत उपस्थित असलेल्या काँग्रेस सरचिटणीस प्रियांका गांधी-वाड्रा यांनी केला नाही, असेही त्यांचे म्हणणे आहे.  



  Print






News - World | Posted : 2019-05-28






Related Photos