चांभार्डा येथील विवाहित महिलेचा सर्पदंशाने मृत्यू


- विवाहानंतर पहिल्या दिवाळीतच घात : निराधार आईवर कोसळले संकट
विदर्भ न्यूज एक्सप्रेस 
प्रतिनिधी / गडचिरोली :
तालुक्यातील चांभार्डा येथील विवाहित महिलेचा सर्पदंशाने मृत्यू झाल्याची घटना शुक्रवार ९ नोव्हेंबर रोजी रात्री ९.३० वाजताच्या सुमारास घडली.  रीना अमोल कोडगले (२०) रा. चांभार्डा असे मृत्यू झालेल्या महिलेचे नाव आहे.  गडचिरोली येथील जिल्हा सामान्य रुग्णालयात उपचारादरम्यान रीना चा मृत्यू झाला.
प्राप्त  माहितीनुसार  धानोरा तालुक्याच्या गिरोला येथील रीना देशमुख हिचा विवाह चांभार्डा येथील अमोल कोडगले यांच्याशी एप्रिल २०१८ मध्ये झाला होता. पहिलीच दिवाळी असल्याने अमोल रिनासह मंगळवारी गिरोला येथे सासुकडे सण साजरा करण्याकरिता आला होता. बुधवार व गुरुवारी सण उत्साहात साजरा केला. परंतु शुक्रवारी नियतीला वेगळेच मान्य होते. शुक्रवारी सायंकाळी घरी चिकन शिजले होते. सात वाजताच्या सुमारास जेवणापूर्वी हात धुण्याकरिता रीना बाथरूमकडे गेली असता अंधारात दडून असलेल्या विषारी सापाने उजव्या पायाला घोटेच्यावर जोरदार दंश केला. रिनाने पाय झटकला व तिने पती अमोल व आपल्या आईला काहीतरी दंश झाल्याचे सांगितले. त्यांनी वेळीच शोध घेतला परंतु साप नेमका कोणत्या जातीचा हे समजून आले नाही. त्यानंतर त्यांनी रुग्णवाहिका व खासगी वाहन शोधण्याचा प्रयत्न केला.  परंतु वेळेवर काहीच उपलब्ध झाले नाही. शेवटी दोन दुचाकीवरच सर्च रुग्णालय गाठले. परंतु दिवाळीच्या सुट्ट्यांमुळे रुग्णालय बंद होते. शेवटी दुचाकीवरूनच रिनाला घेऊन जिल्हा रुग्णालय गाठण्यासाठी निघाले. परंतु मधेच एक दुचाकी बिघडली. तिथेही २० ते ३० मिनिटे वाया गेली. जिल्हा रुग्णालयात रिनाला आणतपर्यंत संपूर्ण शरीरभर विष पसरले. जवळपास रात्रीचे ९ वाजले. ती उपचाराला फारसा प्रतिसाद देत नव्हती. अखेर ९.३० वाजताच्या सुमारास रिनाची प्राणज्योत मालवली.
विशेष म्हणजे, आईला एकटीच असलेल्या रिनाचे वडील ती ३ महिन्यांची असतानाच वारले होते. तेव्हापासून तिच्या आईने तिचे पालनपोषण केले होते. तिची आई अनेक वर्षांपासून गिरोला  आश्रमशाळेत स्वयंपाकासाठी सहकारी म्हणून काम करीत होती. रिनाच्या मृत्यूमुळे तिची आई निराधार झाली आहे.



  Print






News - Gadchiroli | Posted : 2018-11-10






Related Photos