महत्वाच्या बातम्या

महाराष्ट्र वैद्यकीय शिक्षणात आघाडीवर : एमबीबीएस जागांची संख्या ११ हजार ८४६ पर्यंत पोहोचली

विदर्भ न्यूज एक्सप्रेस
वृत्तसंस्था / नवी दिल्ली : केंद्रीय आरोग्य आणि कुटुंब कल्याण मंत्रालयाच्या अहवालानुसार, वैद्यकीय शिक्षणाच्या पायाभूत सुविधांमध्ये उत्तर प्रदेशनंतर महाराष्ट्र आघाडीवर आहे. राज्यातील एकूण वैद्यकीय महाविद्यालयांची संख्या ८० आणि एमबीबीएसच्या जागांची संख्या ११,८४६ पर्यंत पोहोचली आहे. उत्तर प्रदेशात ८५ महाविद्यालये असून, १२ हजार ४७५ एमबीबीएस जागा आहेत. त्यानंतर आता महाराष्ट्राने आघाडी घेतली आहे.

महाविद्यालयांची संख्या वाढली -
देशभरातील वैद्यकीय महाविद्यालयांच्या संख्येत मोठी वाढ झाली आहे. केंद्रीय आरोग्य मंत्रालयाच्या अहवालानुसार, २०२०-२०२१ पासून देशातील महाविद्यालयांची संख्या ५५८ वरून ७८० वर गेली आहे. तसेच, एमबीबीएसच्या जागांमध्ये ४१.९३ टक्क्यांची वाढ होऊन ती ८३,२७५ वरून १लाख १८ हजार १९० पर्यंत पोहोचली आहे. आरोग्य क्षेत्रातील सुधारणा करण्यासाठी या वाढीचा महत्त्वपूर्ण योगदान आहे, विशेषतः जिथे रुग्णभार जास्त आहे.

आधुनिक आरोग्य सेवेची दिशा -
राज्य आणि केंद्र सरकारच्या सहकार्याने या पायाभूत सुविधांची वाढ सुनिश्चित झाली आहे. केंद्रीय योजनांच्या अंतर्गत १५७ नवीन वैद्यकीय महाविद्यालयांना मंजुरी देण्यात आली आहे. त्यापैकी १३१ महाविद्यालये कार्यरत आहेत, ज्यामुळे ८३ महाविद्यालयांमध्ये ४,९७७ एमबीबीएस जागांची वाढ झाली आहे. यामुळे देशभरात आरोग्य सेवा सुधारण्यास मदत होईल.

महाराष्ट्राचा १० टक्के वाटा -
महाराष्ट्राने राज्यातील उपलब्ध ११,८४६ एमबीबीएस जागांसह देशभरातील एकूण पदवीपूर्व वैद्यकीय क्षमतेच्या १० टक्के वाट्याचा हिस्सा घेतला आहे. आगामी काळात दरवर्षी हजारो नवे डॉक्टर तयार होणार असून, यामुळे आरोग्य क्षेत्रात मोठा बदल घडवून येईल.

नवीन उपाय योजना -
नवीन महाविद्यालयांमध्ये प्राध्यापकांच्या कमतरतेला तोंड देण्यासाठी केंद्र सरकारने डीएनबी पात्रतेला अध्यापन पदांसाठी परवानगी दिली आहे. याशिवाय, वैद्यकीय प्राध्यापकांचे निवृत्ती ७० वर्षे केले आहे, ज्यामुळे अध्यापन क्षेत्रात तज्ञांचा पुरवठा सुनिश्चित होईल.

देशभरात २२ नवीन एम्स -
पंतप्रधान आरोग्य सुरक्षा योजनेअंतर्गत (पीएमएसएसवाय) ७५ सुपर स्पेशालिटी ब्लॉक्सना मंजुरी दिली आहे. यापैकी ७१ प्रकल्प पूर्ण झाले आहेत. त्यासोबतच, देशभरात २२ नवीन एम्स महाविद्यालयांची मंजुरी देण्यात आली आहे. यामुळे देशभरातील आरोग्य सेवा आणखी सक्षम होईल.

महाराष्ट्राने वैद्यकीय शिक्षण क्षेत्रात घेतलेल्या या मोठ्या पावलांनी आगामी काही वर्षांत देशभरात डॉक्टरांची संख्या आणि गुणवत्ता वाढविण्यास मदत होईल. या सुधारणांमुळे आरोग्य सेवा अधिक सुगम आणि कार्यक्षम होईल.