महत्वाच्या बातम्या

 दुधाळ गाई, म्हशी खरेदीसाठी मिळणार अर्थसहाय्य


- 13 डिसेंबर ते 11 जानेवारी 2023 दरम्यान करावे ऑनलाईन अर्ज 

- पशुसंवर्धन विभागाच्या योजनांसाठी अर्ज आमंत्रित 

विदर्भ न्यूज एक्सप्रेस 

प्रतिनिधी / भंडारा : पशुसंवर्धन विभागामार्फत मोठ्या प्रमाणावर वैयक्तीक लाभाच्या योजना राबविण्यात येतात. ग्रामीण भागातील सुशिक्षीत व बेरोजगार युवकांना स्वयंरोजगाराचे साधन म्हणून राबविण्यात येणाऱ्या वैयक्तिक लाभाच्या योजनेसाठी ऑनलाईन पद्धतीने अर्ज दाखल करण्याचे आवाहन पशुसंवर्धन विभागामार्फत करण्यात आले आहे.

नाविन्यपुर्ण राज्यस्तरीय व जिल्हास्तरीय योजनेअंतर्गत दुधाळ गाई- म्हशींचे गट वाटप करणे, शेळी मेंढी गट वाटप करणे, कुक्कुट पक्षांच्या संगोपनासाठी निवारा शेड उभारणीस अर्थसहाय्य देणे, कुक्कुट पिल्यांचे वाटप व तलंगा वाटप या योजनेसाठी ऑनलाईन पद्धतीने लाभार्थी निवड प्रक्रिया चालूवर्षात राबविली जाणार आहे. पशुपालकांना डेअरी, पोल्ट्री किंवा शेळीपालन या पैकी ज्या बाबींमध्ये अर्ज करावयाचा आहे त्याची निवड करण्याची सुविधा उपलब्ध करून देण्यात आली आहे.

पशुसंवर्धन विभागाच्या विविध योजना व उपक्रमांच्या माध्यमातून ग्रामीण भागातील पशुपालक, शेतकरी बांधवांना स्वयंरोजगाराचे साधन उपलब्ध करून देण्यासाठी विभागाच्या वतीने वैयक्तिक लाभाच्या योजना अंतर्गत प्रक्रिया अधिक पारदर्शक करणेसाठी राज्यस्तरीय नाविन्यपूर्ण योजनेमध्ये गेली चार वर्षे ऑनलाईन पद्धतीने अर्ज मागविणे व लाभार्थ्यांची निवड करण्याची पद्धत सुरु करण्यात आली आहे. त्या बरोबरच जिल्हास्तरीय विविध योजनांसाठी संगणक प्रणाली लागू करण्यात आली आहे. यामध्ये एखाद्या योजनेकरिता अर्ज केल्यानंतर दरवर्षी पुन्हा अर्ज करावा लागू नये यासाठी तयार केलेली प्रतीक्षा यादी सन 2021-22 पासून पुढील 5 वर्षांपर्यंत सन 2025-26 पर्यंत लागू ठेवण्यात आली आहे. अर्ज केलेल्या पशुपालकांना लाभ मिळण्याची शक्यता वाढली असून, त्याची प्रतीक्षा यादीतील क्रमांकानुसार अंदाजे केव्हा लाभ मिळेल हे कळू शकल्यामुळे लाभार्थी हिस्सा भरने व इतर बाबींकरिता नियोजन करता येणे शक्य होणार आहे.

अर्ज ऑनलाईन पध्दतीने https.//ah.mahabms.com या संकेतस्थळावर किंवा AH.MAHABMS या मोबाईल ॲपवर करायचा असून अर्ज करण्याचा कालावधी 13 डिसेंबर ते 11 जानेवारी 2023 आहे. या संगणकप्रणालीमध्ये अर्ज अत्यंत सुलभ करण्यात आला असून, अर्जामधील माहिती कमीत कमी टाईप करावी लागेल आणि बहुतांशी माहिती बाबत पर्याय निवडण्याची सुविधा उपलब्ध करून देण्यात आली आहे. त्यामुळे पशुपालकांनी अर्ज भरण्याकरिता स्वतःच्या मोबाईलचा वापर करावा. अर्ज भरताना अर्जदाराने नोंदविलेल्या मोबाईल क्रमांकावर अर्जाच्या स्थितीबाबत संदेश पाठविण्यात येणार असल्याने कोणत्याही परिस्थितीत अर्जदाराने योजने अंतर्गत आपला मोबाईल क्रमांक बदलू नये व मागील वर्षी अर्ज केलेल्या अर्जदारांनी पुन्हा अर्ज करावयाचे आवश्यकता नाही.

योजनेबाबत अधिक माहितीकरिता 1962 किंवा 1800-233-0418 टोल फ्री क्रमांकावर किंवा तालुक्याच्या पशुधन विकास अधिकारी (वि) पंचायत समिती, जिल्हा पशुसंवर्धन अधिकारी, उपआयुक्त कार्यालय, तालुका लघुपशुवैधकीय सर्वचिकित्सालय किंवा नजीकच्या पशुवैधकीय केंद्रावर संपर्क साधावा, असे आवाहन जिल्हा पशुसंवर्धन उपायुक्त डॉ. वंजारी यांनी केले आहे.





  Print






News - Bhandara




Related Photos