Petrol Price
भंडारा जिल्ह्यात सुरक्षित बचपन अभियानाचा २६ ऑक्टोबरपासून शुभारंभ
विदर्भ न्यूज एक्सप्रेस
प्रतिनिधी / भंडारा : बालकांचे लैंगिक अत्याचारापासून संरक्षण आणि बालहक्कांबाबत जनजागृती करण्यासाठी जिल्हा विधी सेवा प्राधिकरण, भंडारा व सर्व तालुका विधी सेवा समित्यांच्या कार्यक्षेत्रात सुरक्षित बचपन अभियान राबविण्यात येणार आहे. महाराष्ट्र राज्य विधी सेवा प्राधिकरण, मुंबई यांच्या निर्देशानुसार आणि राष्ट्रीय विधी सेवा प्राधिकरण, नवी दिल्ली यांच्या पुढाकारातून या अभियानाच्या पहिल्या टप्प्याला २६ ऑक्टोबर २०२६ पासून सुरुवात होणार आहे. ही माहिती जिल्हा विधी सेवा प्राधिकरणाचे सचिव तथा वरिष्ठ न्यायाधीश मिलींदकुमार बुराडे यांनी दिली.
लैंगिक अत्याचारापासून बालकांचे संरक्षण कायदा, २०१२ (पोक्सो) याची प्रभावी अंमलबजावणी करणे, बालकांना त्यांच्या अधिकारांची जाणीव करून देणे आणि सुरक्षित वातावरण निर्माण करण्याच्या उद्देशाने ही अखिल भारतीय शालेय जनजागृती मोहीम राबविण्यात येत आहे. बालकांना आत्मसन्मान, शारीरिक सुरक्षितता आणि सर्वांगीण विकासाचा अधिकार असून, त्यासाठी विद्यार्थी, पालक, शिक्षक आणि समाजातील सर्व घटकांमध्ये जागरूकता निर्माण करणे आवश्यक आहे.
गुड टच-बॅड टचबाबत होणार मार्गदर्शन -
अभियानांतर्गत विद्यार्थ्यांना वयानुरूप आणि सोप्या भाषेत वैयक्तिक सुरक्षितता, सुरक्षित व असुरक्षित स्पर्श, अयोग्य वर्तन ओळखणे तसेच संकटाच्या प्रसंगी विश्वासू व्यक्ती किंवा संबंधित यंत्रणेशी संपर्क साधणे, याबाबत मार्गदर्शन केले जाणार आहे. बालकांच्या संरक्षणासाठी उपलब्ध कायदेशीर तरतुदी आणि बाल-संवेदनशील यंत्रणांची माहितीही देण्यात येईल.
दोन टप्प्यांत राबविणार मोहीम -
शहरी व ग्रामीण भागातील सर्व शासकीय, शासकीय अनुदानित आणि खासगी शाळांमध्ये हे अभियान दोन टप्प्यांत राबविण्यात येणार आहे. पहिला टप्पा २६ ते ३१ ऑक्टोबर २०२६ या कालावधीत, तर दुसरा टप्पा नोव्हेंबर २०२६ ते नोव्हेंबर २०२७ या कालावधीत राबविण्यात येईल. या मोहिमेत कार्यरत व सेवानिवृत्त न्यायिक अधिकारी, पॅनल अधिवक्ता, विधी महाविद्यालयांचे विद्यार्थी, पोलीस अधिकारी, बाल संरक्षण अधिकारी, मानसोपचारतज्ज्ञ आणि पोक्सो कायद्यातील तज्ज्ञ समाजसेवक सहभागी होणार आहेत. त्यांच्या माध्यमातून शाळांमध्ये जनजागृतीपर उपक्रम आणि मार्गदर्शन सत्रे आयोजित केली जातील.
बालकांची सुरक्षितता आणि बालहक्कांचे संरक्षण ही सामूहिक जबाबदारी असून, या अभियानाच्या यशस्वी अंमलबजावणीसाठी शाळा, पालक आणि समाजातील सर्व घटकांनी सक्रिय सहभाग नोंदवावा, असे आवाहन जिल्हा विधी सेवा प्राधिकरण, भंडारा यांच्यातर्फे करण्यात आले आहे.
