Petrol Price
चंद्रपूरात राष्ट्रवादी काँग्रेस (शरद पवार) पक्षाचा दुष्काळग्रस्त महिलांसाठी जनसंवाद : महिलांचा उत्स्फूर्त प्रतिसाद
विदर्भ न्यूज एक्सप्रेस
प्रतिनिधी / चंद्रपूर : दुष्काळामुळे ग्रामीण भागातील महिलांना भेडसावणाऱ्या पाणीटंचाई, रोजगाराचा अभाव, जनावरांच्या चाऱ्याची समस्या आणि महिलांच्या आहारावर होणारे विपरीत परिणाम यांसह विविध प्रश्नांना वाचा फोडण्यासाठी राष्ट्रवादी काँग्रेस (शरद पवार) पक्षाच्या वतीने महिला जनसंवाद व वस्तुस्थिती सर्वेक्षण उपक्रम राबविण्यात आला. चंद्रपूर येथील हॉटेल सिद्धार्थ प्रीमियम येथे आयोजित या कार्यक्रमाला महिलांचा उत्स्फूर्त प्रतिसाद मिळाला. यावेळी महिलांनी आपल्या समस्या निर्भीडपणे मांडत दुष्काळामुळे निर्माण झालेल्या अडचणींकडे लक्ष वेधले.
राष्ट्रवादी काँग्रेस (शरद पवार) पक्षाच्या महिला राष्ट्रीय अध्यक्षा तथा माजी खासदार फौजिया खान यांच्या मार्गदर्शनाखाली संपूर्ण महाराष्ट्रात हा जनसंवाद दौरा आयोजित करण्यात आला आहे. या उपक्रमांतर्गत चंद्रपूर येथे पक्षाच्या ज्येष्ठ नेत्या तथा माजी महिला प्रदेशाध्यक्ष विद्याताई चव्हाण आणि राज्य निरीक्षक आशाताई मिरगे यांनी महिलांशी थेट संवाद साधत त्यांच्या समस्या जाणून घेतल्या.
दुष्काळामुळे ग्रामीण भागातील महिलांचे जीवन अधिक कठीण झाले आहे. पिण्याच्या पाण्यासाठी करावी लागणारी वणवण, रोजगाराच्या मर्यादित संधी, जनावरांसाठी चाऱ्याची टंचाई आणि कुटुंबाच्या पोषणाचा प्रश्न अशा अनेक समस्यांना महिलांना सामोरे जावे लागत आहे. या परिस्थितीचा महिलांच्या आरोग्यावर आणि दैनंदिन जीवनावर होणारा परिणामही यावेळी समोर आला. उपस्थित महिलांनी आपल्या अडचणी निर्भीडपणे मांडत शासनाने या प्रश्नांकडे गांभीर्याने लक्ष देण्याची गरज व्यक्त केली.
महिलांच्या समस्या जाणून घेतल्यानंतर विद्याताई चव्हाण आणि आशाताई मिरगे यांनी महिलांना आधार देत त्यांच्या हक्कांसाठी पक्षाच्या माध्यमातून सातत्याने आवाज उठविण्याची ग्वाही दिली. दुष्काळाच्या परिस्थितीत महिलांना भेडसावणाऱ्या विविध समस्यांच्या निराकरणासाठी पुढाकार घेण्यात येईल. महिलांनी मांडलेल्या प्रश्नांना न्याय मिळवून देण्यासाठी पक्ष त्यांच्या पाठीशी ठामपणे उभा राहील, असे त्यांनी सांगितले. महिलांच्या अडचणी प्रत्यक्ष जाणून घेऊन त्या शासनापर्यंत पोहोचविणे आणि त्यांच्या प्रश्नांना वाचा फोडणे, हा या उपक्रमाचा मुख्य उद्देश असल्याचेही त्यांनी स्पष्ट केले.
चंद्रपूर शहर जिल्हाध्यक्ष बेबीताई उईके यांच्या आयोजनातून हा उपक्रम राबविण्यात आला. जिल्ह्यातील १५ तालुक्यांमध्ये महिलांशी जनसंवाद साधून वस्तुस्थिती सर्वेक्षण करण्यात आले. या सर्वेक्षणांतर्गत जिल्ह्यातील १५ तालुक्यांतून एकूण १,५०० सर्वेक्षण अर्ज संकलित करण्यात आले. या अर्जांच्या माध्यमातून दुष्काळग्रस्त महिलांच्या समस्या, त्यांची सद्यस्थिती आणि त्यांना भेडसावणाऱ्या अडचणींची माहिती संकलित करण्यात आली. संकलित अर्ज बेबीताई उईके आणि जिल्ह्यातील महिला पदाधिकाऱ्यांनी विद्याताई चव्हाण व आशाताई मिरगे यांच्याकडे सुपूर्द केले.
या कार्यक्रमाला पक्षाचे प्रवक्ते प्रवीण कुंटे, चंद्रपूर जिल्हा निरीक्षक अविनाश गोतमारे, प्रदेश सरचिटणीस हिराचंद बोरकुटे, यवतमाळ जिल्हाध्यक्ष वर्षा निकम, राष्ट्रीय सचिव सोनाली देशमुख आणि प्रदेश सरचिटणीस अंजली साळवे यांची प्रमुख उपस्थिती होती.
यावेळी शहर जिल्हाध्यक्ष नंदिनी गौरकार, युवक शहर जिल्हाध्यक्ष कलाकार मल्लारप, आदिवासी शहर जिल्हाध्यक्ष जनार्दन गेडाम, युवक जिल्हा कार्याध्यक्ष संजय ठाकूर, सेवादल शहर जिल्हाध्यक्ष विलास नखाते, ओबीसी महिला अध्यक्ष नंदा शेरकी, जिल्हा उपाध्यक्ष कवठे मॅडम, तालुकाध्यक्ष अनिता मावलीकर यांच्यासह सुशीला गेडाम, नीता गेडाम, संचिता मेसराम, माया देशभ्रतार, दीपक काटकोजवार, अरविंद माहुरपवार, अरविंद परचाके, रुपेश मुलकावर, सुभाष नन्नावरे, प्रशांती ताई, हर्षा खैरकर, शोभा घरडे, लता जांभुळकर, नीलिमा आत्राम, सरस्वती गावंडे, सुरेखा कुंभारे आणि वर्षा शेडमाके यांच्यासह महिला पदाधिकारी व कार्यकर्त्या मोठ्या संख्येने उपस्थित होत्या.
दुष्काळामुळे महिलांच्या वाट्याला आलेल्या संघर्षाला वाचा फोडण्यासाठी आणि त्यांच्या समस्या शासनदरबारी मांडण्यासाठी आयोजित या जनसंवाद उपक्रमातून ग्रामीण महिलांच्या प्रश्नांना व्यासपीठ मिळाले आहे.
