विखुरलेल्या संसाराचा आधार बनण्या सरसावल्या आधारविश्व फाऊंडेशच्या रणरागिणी


- भामरागड पूरग्रस्तांना जीवनावश्यक साहित्याची मदत 
प्रतिनिधी / गडचिरोली : 
भामरागड तालुक्यातील महापुरामुळे अनेक गावे व अनेकांचे संसार उघड्यावर पडल्याचे विदारक चित्र सोशल मीडियाच्या माध्यमातून बघायला मिळाले. अशा  परिस्थितीत एक हात आधाराचा द्यावा या हेतूने  आधारविश्व फाऊंडेशन च्या सर्व  सदस्या एकत्र आल्या.  आधारविश्व फाऊंडेशनच्या अध्यक्षा गीता हिंगे यांनी सभा घेतली व लगेच निधी व साहित्याची जमवा जमव करून ५५ किट तयार केल्या. यामध्ये  जीवनावश्यक साहित्य जसे तांदूळ, डाळ, बेसन, तिखट, हळद, तेल, आगपेटी, मेणबत्ती, साबण, निरमा,  मीठ पुडा, चादरी इत्यादी साहित्य टाकून किट तयार करण्यात आले. यानंतर सुरु झाली विखुरलेले संसार सविण्याची मोहीम.  
२० सप्टेंबर रोजी   सदस्यांनी भामरागडला जायचे ठरले. ठरल्या प्रमाणे सकाळी ५.३०  वाजता गीताताई हिंगे यांच्या कडे सर्व सदस्या गोळा झाल्या.    निघायची तयारी सुरु झाली. वाहनात सामान टाकले आणि गाडी सुरुच होईना. कळले की बॅटरी खराब झाली,  नाराजी आली पण प्रयत्न सोडले नाही.  दोन तासांनी दुसरी बॅटरी आली गाडी सुरु झाली, श्री गणेशाचे नाव घेऊन सर्व गाडीत बसले.  जेमतेम १० किलोमीटर अंतर  गाडी  गेली आणि गाडीचा बेल्ट तुटला. दुसरी गाडी बोलावल्या शिवाय पर्याय नाही असे चालकाने सांगितले. सदस्यांची खूप निराश झाली. टूर रद्द होईल का ही भीती वाटत होती पण उठा लढा सज्ज व्हा याप्रमाणे वाहनधारकांशी चर्चा करून विनवणी करून तब्बल दोन तासांनी दुसरी गाडी मिळविली.  पुन्हा आनंदात सर्वजणी गाडी मध्ये बसल्या आणि गाडी भामरागडच्या दिशेने रवाना झाली.
 भामरागड पोहचल्यावर  तहसीदार कैलास  अंडील यांची भेट घेतली . त्यांनी  चर्चेअंती पुरपीडित गावांची नावे सांगितली.  सर्व महिला असल्यामुळे जवळपासच्या गावात जा असे ते म्हणाले पण सर्व महिलांनी आम्ही कुठेही जायला तयार आहोत असे ऐकल्यावर आणि महिलांचा उत्साह आणि धाडस  पाहून  तहसीलदारांनी  ३ - ४ गावांची नावे सांगितली.  भामरागड पासून १५ किमी  अंतरावरील गाव निवडले.    जिथे जाण्याचा मार्ग पुरामुळे उध्वस्त झालेला होता.  तहसीलदर अंडील यांनी  २ कोतवाल दिले.  मुरंगल, कोयर, आणि मलमपोडूर ही तीन गावे निवडली. रस्ता अतिशय खडतर होता.  त्यातच या सर्वांसोबत ६५ वर्षीय सदस्या  मॅडम होत्या.  त्यांच्या कडे बघून सर्वांनां स्फूर्ती मिळत होती. गावात पोहचल्या नंतर सगळीकडे सामसूम होती २० - २५ घराची वस्ती असलेले  गाव .  भाषेची अडचण तरीही सोबत असलेल्या कोतवालांची   मदत घेऊन एक एक करून सर्वाना गोळा केले.  तयार केलेली किट व कपड्याचे वितरण केले, वाटप करताना गावातच सायंकाळ चे ६.३०  वाजले गावकरी व सहकारी म्हणाले लवकर निघा  सर्व महिलाच आहेत.  यावेळी कुणाच्याही मनात भीती नव्हती.  फक्त त्यांना दिसत होती गावकऱ्यांची दयनीय अवस्था आणि आपण आपल्या पूर पीडित बांधावा पर्यंत योग्य वेळेच्या आत जीवनावश्यक सामान पोहचविल्याचे समाधान. 
 यानंतर पुन्हा  तहसीलदार अंडील यांची भेट घेऊन   पूरपरिस्थितीबाबत जाणून घेतले.  अवस्था अक्षरशः अंगावर काटे आणणारी होती.  ७५ टक्के भामरागड तालुक्याच्या गावात पाणी पसरले होते. एक आठवडा वीज नव्हती, दूरध्वनी सेवा खंडित, गावांशी संपर्क तुटलेला, प्रत्येक ठिकाणी माणसे पाठवून २४ तास मदत कार्य सूरू ठेवले  होते. जसे जमेल तसें अनेक कुटुंब शाळा, तहसील ऑफिस, पंचायत समिती इ. ठिकाणी हलविण्यात आली.  घराघरात पाणी घुसले होते. अनेकांचे गॅस सिलेंडर पासून तर सर्व सामान वाहून गेले होते. खरंच त्या काळात शासकीय यंत्रणा अतिशय वेगात कामाला लागली होती.  
या सर्व परिस्थितीची माहिती जाणून घेत सर्व सदस्या भामरागड बाहेर पडल्या. पुन्हा खडतर प्रवास करीत गडचिरोली गाठले.  या कार्यात आधार विश्व फाऊंडेशन च्या अध्यक्षा गीता हिंगे, सचिव सुनीता साळवे, सदस्य कांचन चौधरी, शहनाझ शेख,, मीरा कोलते, स्नेहा आखाडे, विजया मने, धनश्री तुकदेव  , सुचिता धकाते, लीला डांगे, आरती खोब्रागडे, लता संतोषवार, आरती सरोदे त्याचप्रमाणे निधी, धान्य तसेच जीवनावश्यक वस्तूंची मदत करणाऱ्या देवयानी घरोटे, शकुंतला पोरेड्डीवार, ज्योत्सना रामगिरवार, विना जंबेवार, अरुंधती नाथानी, शीतल कस्तुरवार, तनुजा जोशी, गीता तुमराम, अश्विनी शृंगारपवार, उज्वला करपे, एकता चिलमवार, ऐश्वर्या लाकडे, दिलीप सारडा, शालूताई कुमरे, मंजू कृष्णापूरकर, प्राजक्ता अलोनी, अल्का सज्जनपवार, कांचन पोरेड्डीवार, अमित पुंडे, प्रियंका काबरा, दीप्ती वैद्य, मीनल हेमके या सर्वांचे सहकार्य मिळाले.



  Print






News - Gadchiroli | Posted : 2019-09-24






Related Photos