महत्वाच्या बातम्या

वर्धा जिल्हा मध्यवर्ती सहकारी बँक सक्षमीकरण अभियान

- १२ लाख ५० हजार रुपयाची ठेवी जमा

विदर्भ न्यूज एक्सप्रेस
प्रतिनिधी / वर्धा : वर्धा जिल्हा सहकारी बँकेचे सक्षमीकरण करण्यासाठी अभियान राबविण्यात येत आहे. या अभियानांतर्गत १२ लाख रुपयाच्या मुदती ठेवीचा धनादेश जिल्हाधिकारी तथा बँकेच्या सनियंत्रण समितीचे अध्यक्ष राहुल कर्डिले यांना सुपुर्द करण्यात आला. यावेळी बँकेचे मुख्य कार्यकारी अधिकारी संजय कोरडे, लेखा विभाग प्रमुख संजय माटे आदी उपस्थित होते.

१११ वर्षापासुन नावलौकीक असलेली शेतकऱ्यांची बँक म्हणुन ओळखली जाणारी वर्धा जिल्हा मध्यवर्ती सहकारी बँक पुन्हा एकदा नव्याने शेतकऱ्यांच्या सेवेत रुजू होण्यासाठी वर्धा जिल्हा मध्यवर्ती सहकारी बँक सक्षमीकरण अभियान राबविण्यात येत आहे. या अभियानांतर्गत वैद्यकीय जनजागृती मंचाचे संस्थापक डॉ. सचिन पावडे यांनी ५ लाख रुपयाचा तर बापुराव देशमुख फाऊंडेशनच्यावतीने फाऊंडेशनचे अध्यक्ष शरद देशमुख यांनी ७ लाख रुपये व सचिव साहिल देशमुख यांनी ५० हजाराचा मुदत ठेवीचा धनादेश जिल्हाधिकारी राहुल कर्डिले यांना सुपुर्द केला.

जिल्ह्यातील विविध सहकारी संस्थांच्या माध्यमातुन तसेच जिल्हाधिकारी यांनी केलेल्या आवाहनाच्या माध्यमातून बँक सक्षमीकरण अभियानास गती मिळाली आहे. सोबतच बँकेच्या थकीत कर्जदारांवरही कठोर कारवाई करण्याबाबतचे निर्देश देण्यात आले आहे. या माध्यमातून लवकरच जिल्ह्यातील आर.आर.सी. प्राप्त थकीत कर्जदारांच्या मालमत्ता जप्तीची व लिलावाची कार्यवाही सुरु होत आहे.

सक्षमीकरण अभियानांतर्गत बँकेतील ठेवी वाढविण्याच्यादृष्टीने प्रयत्न करण्यात येत आहे तसेच वैयक्तिक तथा संस्थात्मक ठेवी मिळवितांनाच बँकेतील जुन्या ठेवीवरील चालू आर्थिक वर्षाचे व्याज मार्च २०२४ पर्यंत ठेवीदारांना वितरीत करण्यात येत आहे. कर्ज वसुलीबाबत कर्जदारांविरुध्द कठोर कार्यवाही करण्यात येत आहे. सोबतच बँकेचे संगणकीकरण, बँक इमारतीचे नुतणीकरण रंग रंगोटी, कर्मचारी प्रशिक्षण घेण्यात येत आहे, असे वर्धा जिल्हा मध्यवर्ती सहकारी बँकेच्यावतीने कळविण्यात आले आहे.