Petrol Price
हिवाळ्यापूर्वीच उन्हाचा तडाखा वाढला : किटाडीत तापमान ३५ अंशांवर
- सकाळी गारवा, तर दुपारी कडक ऊन; बदलत्या वातावरणामुळे नागरिक हैराण
विदर्भ नव एक्सप्रेस
प्रतिनिधी / भंडारा : यंदा अत्यल्प पाऊस झाल्यामुळे ऑक्टोबर महिन्यापासूनच उन्हाचा तडाखा वाढू लागला आहे. कमाल तापमान ३५ अंश सेल्सिअसच्या आसपास पोहोचल्याने हिवाळ्याची चाहूल लागण्यापूर्वीच नागरिकांना उकाड्याचा सामना करावा लागत आहे. सकाळच्या वेळी हवेत हलका गारवा जाणवत असला, तरी दुपारच्या सुमारास उन्हाच्या झळा तीव्र होत असल्याने परिसरातील वातावरणात मोठा बदल जाणवत आहे.
यंदा पावसाचे प्रमाण अत्यल्प राहिल्याने ऑक्टोबर महिन्यातही उष्णतेची तीव्रता कायम असल्याचे चित्र दिसून येत आहे. या काळात वातावरणात गारवा वाढण्याची अपेक्षा असताना उन्हाचा तडाखा कायम असल्याने नागरिकांना उकाड्याचा त्रास सहन करावा लागत आहे. हिवाळ्याची चाहूल लागली असली, तरी प्रत्यक्षात थंडीपेक्षा उन्हाची तीव्रताच अधिक जाणवत आहे.
पहाटेच्या वेळी हवेत जाणवणारा हलका गारवा आणि सकाळचे आल्हाददायक वातावरण यामुळे नागरिक मॉर्निंग वॉकसाठी घराबाहेर पडत आहेत. सकाळच्या वेळेत वातावरण प्रसन्न असल्याने रस्त्यांवर फिरायला जाणाऱ्यांची वर्दळ दिसून येते. मात्र, सूर्य वर येताच उन्हाची तीव्रता वाढू लागते. दुपारच्या सुमारास कडक ऊन आणि उकाड्यामुळे नागरिकांना अस्वस्थतेचा सामना करावा लागत आहे.
सध्या सकाळी गारवा आणि दुपारी कडक ऊन, असे संमिश्र वातावरण अनुभवायला मिळत आहे. दिवसाच्या सुरुवातीला जाणवणारा थंडावा काही तासांतच कमी होऊन उष्णतेची तीव्रता वाढत आहे. त्यामुळे नागरिकांना दिवसातील बदलत्या वातावरणानुसार आपल्या दिनचर्येत बदल करावा लागत आहे.
एकीकडे हिवाळ्याची चाहूल लागली असताना दुसरीकडे उन्हाचा तडाखा कायम असल्याने नागरिकांमध्ये या बदलत्या हवामानाची चर्चा सुरू आहे. अत्यल्प पाऊस आणि ऑक्टोबर महिन्यात जाणवणारी उष्णता यामुळे किटाडी परिसरात सध्या सकाळचा गारवा आणि दुपारचे कडक ऊन असे परस्परविरोधी वातावरण पाहायला मिळत आहे.
