महत्वाच्या बातम्या

मतदार यादी निरीक्षक विजयलक्ष्मी बिदरी उद्या वर्धेत

- मतदार यादीच्या निरीक्षणाबाबत आढावा बैठक
- खासदार,आमदारांसह राजकीय पक्षांच्या प्रतिनिधींची असणार उपस्थिती

विदर्भ न्यूज एक्सप्रेस
प्रतिनिधी / वर्धा : भारत निवडणूक आयोगाच्यावतीने छायाचित्रांसह मतदार यादीचा विशेष संक्षिप्त पुनरिक्षण कार्यक्रम राबविण्यात येत आहे. या कार्यक्रमांतर्गत मतदार यादी निरीक्षक म्हणून नियुक्त करण्यात आलेल्या विभागीय आयुक्त विजयलक्ष्मी बिदरी १९ डिसेंबर रोजी जिल्ह्याच्या दौऱ्यावर येत असून मतदार यादीच्या निरीक्षणाबाबत आढावा व खासदार, आमदारांसह राजकीय पक्षाच्या प्रतिनिधींसोबत बैठक घेणार आहे.

मतदार यादीचा विशेष संक्षिप्त पुनरिक्षण कार्यक्रमाच्या संपूर्ण कालवधीमध्ये जिल्ह्यात मतदार यादी निरीक्षकांच्या तीन भेटी नियोजित असून विशेष पुनरिक्षण कार्यक्रमाचे दावे व हरकती सादर करण्याच्या कालावधीत पहिली भेट. दावे व हरकती निकाली काढण्याच्या कालावधीत दुसरी भेट तर मतदार यादी प्रसिध्दी करण्याच्या कालावधी तिसरी भेट देणार आहे. या भेटी दरम्यान मतदार यादीचे निरीक्षण करण्यात येणार आहे.

मतदार यादी निरीक्षक विजयलक्ष्मी बिदरी जिल्ह्यात दुसरी भेट १९ डिसेंबर रोजी देणार असून जिल्हाधिकारी कार्यालयात दुपारी ४.३० वाजता जिल्ह्यातील खासदार, सर्व आमदार व मान्यता प्राप्त राजकीय पक्षांच्या प्रतिनिधींची बैठक आयोजित करण्यात आली आहे. या बैठकीला उपस्थित राहण्याचे आवाहन जिल्हाधिकारी तथा जिल्हा निवडणूक अधिकारी राहुल कर्डिले यांनी केले आहे.

वर्धा लोकसभा मतदार संघांतर्गत आर्वी, देवळी, हिंगणघाट व वर्धा या मतदारसंघांची मतदान केंद्रनिहाय प्रारुप मतदार यादी २७ ऑक्टोबर रोजी प्रसिध्द करण्यात आली आहे. जिल्ह्याची एकूण प्रक्षेपित लोकसंख्या १४ लाख २६ हजार ७५६ असून त्यापैकी १० लाख ८३ हजार ८३ इतकी प्रारुप मतदार यादीनुसार मतदारांची संख्या आहे. चारही विधानसभेमध्ये १ हजार ३०० मतदान केंद्रांमध्ये मतदानाची व्यवस्था करण्यात येणार आहे.