Petrol Price
नन्हे सितारे विभागीय स्पर्धेत लोक बिरादरीचे नन्हे सितारे चमकले
विदर्भ न्यूज एक्सप्रेस
तालुका प्रतिनिधी / भामरागड : आदिवासी विकास विभागांतर्गत, ओपन लिंक फाऊंडेशन मार्फत इ.१ ली ते ८ वीच्या वर्गातील विद्यार्थ्यांकरीता नन्हे सितारे उपक्रमांतर्गत विभागीय स्पर्धा ३० सप्टेंबर २०२६ ला शासकीय आश्रम शाळा,कवडस, तालुका- हिंगणा, जिल्हा- नागपूर येथे घेण्यात आली. यामध्ये एकात्मिक आदिवासी विकास प्रकल्प भामरागड अंतर्गत लोकबिरादरी आश्रम शाळा, हेमलकसा येथील आठ पैकी सात विद्यार्थ्यांनी उत्कृष्ट सादरीकरण करून नन्हे सितारे विभागीय स्पर्धेत लोक बिरादरीचे नन्हे सितारे प्रावीण्य प्राप्त करीत चमकले.
नागपूर विभागातील सर्व एकात्मिक आदिवासी विकास प्रकल्पांतर्गत शासकीय व अनुदानित आश्रम शाळांमधील इयत्ता १ ली ते ८ वीच्या विद्यार्थ्यांसाठी नन्हे सितारे उपक्रमांतर्गत,ओपन लिंक फाऊंडेशनमार्फत विद्यार्थ्यांमध्ये इंग्रजी संवाद कौशल्य,आत्मविश्वास, सर्जनशीलता व सार्वजनिक सादरीकरण क्षमता विकसित करण्यासाठी विद्यार्थ्यांना प्रतिभा सादर करण्यासाठी आदिवासी विकास विभागांतर्गत व्यासपीठ उपलब्ध करून देण्यात आले होते. त्यामध्ये नागपूर विभागातील सर्व एकात्मिक आदिवासी विकास प्रकल्पांतर्गत येणाऱ्या शासकीय व अनुदानित आश्रम शाळांमधील प्रतीप्रकल्प अकरा नन्हे सितारे विद्यार्थ्यांची निवड करण्यात आली.
सदर नन्हे सितारे उपक्रमांतर्गत ३० सप्टेंबरला शासकीय आश्रम शाळा, कवडस, जिल्हा- नागपूर येथे विभागीय स्पर्धैचे आयोजन करण्यात आले होते. यामध्ये भामरागड प्रकल्पांतर्गत लोक बिरादरी आश्रम शाळेचे आठ नन्हे सितारे सहभागी झाले होते. त्यापैकी सात विद्यार्थ्यांनी प्रावीण्य मिळवले. यामध्ये गट- इ.१ ली ते ३ री- कथा सादरीकरण- समिक्षा नितीन मायनाळे- तृतीय, कविता सादरीकरण- अनन्या बाबुराव कोंडागुर्ले- तृतीय. गट-इ. ४ थी ते ५ वी - कथा सादरीकरण-कार्तिक प्रकाश सोयाम- प्रथम, स्पोकन इंग्लिस- काव्यांजली दशरथ कोरेत- प्रथम, कविता सादरीकरण- शर्मिला मूरा आत्राम- द्वितीय, स्पेलिंग बी- नविना राजू कुरसामी- तृतीय. गट-इ. ६ वी ते ८ वी- कविता सादरीकरण- तनुजा सुधाकर तोप्पा- प्रथम यांचा समावेश आहे.
प्राविण्यप्राप्त विद्यार्थ्यांचे मार्गदर्शक शिक्षक सुरेश गुट्टेवार, तुषार कापगते, विजया किरमिरवार, हिना गुट्टेवार,निर्मला सिडाम, रंजना सडमेक, मोनिका येजुलवार व प्राविण्यप्राप्त विद्यार्थी यांचे मुख्याध्यापक गिरीष कुलकर्णी, शरीफ शेख, शिक्षक तथा शिक्षकेत्तर कर्मचारी यांनी अभिनंदन केले.
