स्थानिक गुन्हे शाखेने जप्त केला ५२ लाखांचा दारूसाठा


विदर्भ न्यूज एक्सप्रेस
प्रतिनिधी / चंद्रपूर :
स्थानिक गुन्हे शाखेच्या पथकाने आज ३ जून रोजी केलेल्या कारवाईत ५२ लाख २० हजारांचा दारूसाठा जप्त केला आहे. ३ आरोपींना अटक करण्यात आली असून ५ चारचाकी वाहने जप्त करण्यात आली आहेत.
३ जून रोजीरात्री गोपनिय माहितीच्या आधारे बाबुपेठ डीएड काॅलेजच्या मागे टाटा ४०७ वाहन क्रमांक एमएच ०२/ ३०८१ मध्ये अवैध देशी दारू आणून महिंद्रा बोलेरो वाहन पिक अप क्रमांक एमएच ३४ एबी ८९२२ मध्ये दारूसाठा भरत असल्याची माहिती मिळाली. या ठिकाणी पोलिसांनी धाड टाकली असता दोन्ही वाहनासह १३७ पेट्या दारू आढळून आली. या कारवाईत २५ लाख ७० हजारांचा मुद्देमाल जप्त करण्यात आला. 
दुसऱ्या कारवाईत मुल - चंद्रपूर मार्गावर घंटा चौकीसमोर नाकेबंदी करून इंडीगो कार क्रमांक एमएच ३४ के ३०७० ची तपासणी केली असता वाहनाच्या डीक्कीत सहा बोरीमध्ये २ हजार निपा दारू आढळून आली. वाहनासह एकूण ६ लाखांचा मुद्देमाल जप्त करण्यात आला. यावेळी दोन आरोपींना अटक करण्यात आली. 
तिसर्या कारवाईत चंद्रपूर येथील नेहरू चौकात नाकाबंदीदरम्यान एमएच ०२ बीडी ३०४० क्रमांकाच्या होंडासिटी कारची तपासणी केली असता देशी दारूच्या १५ पेट्या आढळून आल्या. या कारवाईत ८ लाख ५० हजारांचा मुद्देमाल जप्त करण्यात आला. 
चौथ्या  कारवाईत भवनाजी बाई शाळेसमोर मुल मार्गावर सापळा रचून महिंद्रा पिक अप क्रमांक एमएच ३३ टी ०४९० ची तपासणी केली असता मुरूमाच्या पोत्याखाली ७० देशी दारूच्या पेट्या आढळून आल्या. या कारवाईत १२ लाखांचा मुद्देमाल जप्त करण्यात आला. सदर कारवाई पोलिस अधीक्षक महेश्वर रेड्डी यांच्या मार्गदर्शनात स्थानिक गुन्हे शाखेचे प्रभारी पोलिस निरीक्षक ओ.जी. कोकाटे यांच्या नेतृत्वात पोलिस उपनिरीक्षक जावेद शेख, सहाय्यक फौजदार पंडीत वर्हाटे, नितीन जाधव, नापोशि अविनाश दशमवार, नापोशि मिलींद चव्हाण, जमीर पठाण, गजानन नागरे, संजय आतकुलवार, अनुप डांगे, नईम खान, अमजद खान, मयुर यांनी केली आहे.

 



  Print






News - Chandrapur | Posted : 2019-06-03






Related Photos