महत्वाच्या बातम्या

 चिमुकल्या अद्विकचा बळी घेणाऱ्या बिबट्याच्या शोधासाठी तिरीत १२ पिंजरे : वनविभाग अलर्ट


- घटनास्थळापासून ७०० मीटरपर्यंत पगमार्क आढळले; ट्रॅप कॅमेरेही लावले, शेकडो ग्रामस्थांच्या उपस्थितीत अंत्यसंस्कार

विदर्भ न्यूज एक्सप्रेस 
प्रतिनिधी / भंडारा : पवनी तालुक्यातील तिरी गावात सहा महिन्यांच्या चिमुकल्या अद्विकचा बिबट्याने बळी घेतल्याच्या घटनेनंतर वनविभाग सतर्क झाला आहे. बिबट्याला जेरबंद करण्यासाठी गाव परिसरात १२ पिंजरे, बेड आणि ट्रॅप कॅमेरे लावण्यात आले आहेत. घटनास्थळापासून सुमारे ७०० मीटर अंतरापर्यंत बिबट्याचे पगमार्क आढळल्याने परिसरात शोधमोहीम तीव्र करण्यात आली आहे.

शुक्रवारी सायंकाळी ६.३० वाजताच्या सुमारास अड्याळ वनपरिक्षेत्रातील तिरी गावात घरातील पाळण्यात झोपलेल्या सहा महिन्यांच्या अद्विक अभिमन बोंदरे याला बिबट्याने उचलून नेले होते. घरापासून सुमारे १०० मीटर अंतरावर त्याचा मृतदेह आढळला. या घटनेमुळे गावात संतापाचे वातावरण निर्माण झाले होते. शनिवारी सकाळी शवविच्छेदनानंतर शेकडो ग्रामस्थांच्या उपस्थितीत अद्विकवर अंत्यसंस्कार करण्यात आले.

दरम्यान, शनिवारी ग्रामपंचायत आवारात वनविभाग आणि ग्रामस्थांची अडीच तास बैठक झाली. यावेळी ग्रामस्थांनी वन्यप्राण्यांचा बंदोबस्त, जंगलालगतच्या मार्गावरील झाडीझुडपे हटविणे, मिश्र रोपवन, तसेच पशुधन व पिकांच्या नुकसानीची वेळेत भरपाई यांसह १५ मागण्यांचे निवेदन वन, पोलिस आणि महसूल विभागाला दिले.

सहाय्यक उपवनसंरक्षक सचिन नीलख यांनी ग्रामस्थांना आश्वासन देताना, बिबट्या पकडला जात नाही तोपर्यंत गावातील वनविभागाचे पथक हटविण्यात येणार नाही, असे स्पष्ट केले. तसेच शेतकऱ्यांच्या समस्या जाणून घेण्यासाठी आठवड्यातून एक दिवस विशेष कॅम्प आयोजित करण्यात येईल, असेही सांगितले. या घटनेमुळे तिरीसह परिसरातील गावांमध्ये भीतीचे वातावरण असून बिबट्याला लवकरात लवकर पकडण्याची मागणी ग्रामस्थांकडून होत आहे.





  Print






Related Photos