महत्वाच्या बातम्या

उभ्या ट्रकला एलसीबीचे वाहन धडकले : एक ठार तर दोन जण जखमी

विदर्भ न्यूज एक्सप्रेस

प्रतिनिधी / गोंदिया : रस्त्यावर उभ्या असलेल्या ट्रकला गोंदियाच्या स्थानिक गुन्हे शाखेचे वाहन धडकल्याने एक पोलिस कर्मचारी ठार, तर दोन गंभीर जखमी झाले. ही घटना ग्रामीण पोलीस ठाण्यांतर्गत येणाऱ्या ढिमरटोली येथील विकास राइस मिलसमोर ७ डिसेंबरच्या पहाटे २ वाजताच्या सुमारास घडली.

स्थानिक गुन्हे शाखेचे पोलिस जुगारावर कारवाई करण्यासाठी अर्जुनी-मोरगाव येथे गेले होते. रात्री अर्जुनी-मोरगाववरून गोंदियाकडे परत येत असताना स्थानिक गुन्हे शाखेचे पोलिस वाहन (एमएच ३५ एजी ७५७८) हे रस्त्यावर उभे असलेल्या ट्रक (एमएच ४० वाय ५६८६) ला धडकले. यात पोलिस शिपाई विजय मानकर (ब.नं. २०९५) यांचा मृत्यू झाला, तर पोलिस उपनिरीक्षक गोपाल कापगते व पोलिस हवालदार तुलसीदास लुटे (ब. नं. १२३१) हे गंभीर जखमी झाले. गंभीर जखमीं याना गोंदियाच्या खासगी रुग्णालयात दाखल करण्यात आले. पोलिस हवालदार सुरेंद्र खोब्रागडे यांच्या तक्रारीवरून गोंदिया ग्रामीण पोलिसांनी भा.दं.वि.च्या ३०४ अ ३३७, ३३८ या कलमाने गुन्हा दाखल केला आहे.