२ ते ४ जुलै दरम्यान विदर्भातील बहुतांश भागात पावसाचा अंदाज


-  मराठवाडा आणि मध्य-महाराष्ट्रात हलक्या पावसाचा अंदाज
विदर्भ न्यूज एक्सप्रेस 
प्रतिनिधी / मुंबई :
बंगालच्या उपसागराकडून येणाऱ्या एका कमी दाबाच्या क्षेत्रामुळे २ ते  ४ जुलै दरम्यान विदर्भातील बहुतांश भागात पाऊस पडण्याचा अंदाज हवामान तज्ज्ञांनी वर्तविला आहे. या दरम्यान पूर्व-विदर्भातील भंडारा, गोंदिया, गडचिरोली, चंद्रपूर, नागपूर, वर्धा, पूर्व-अमरावती आणि यवतमाळ जिल्ह्यांत चांगल्या पावसाचा अंदाज आहे.
 या जिल्ह्यांच्या तुलनेत विदर्भातील इतर भागांत पावसाचे प्रमाण कमी राहील. या दरम्यान पश्चिम-विदर्भाच्या जवळ असलेल्या औरंगाबाद, जालना, परभणी, हिंगोली आणि नांदेड जिल्ह्यांतील पूर्व भागांमध्ये चांगल्या पावसाची शक्यता नाकारता येणार नाही. उर्वरित मराठवाडा, मध्य-महाराष्ट्र आणि खान्देशात मात्र प्रामुख्याने हलका पाऊस पडेल, असे मत हवामान तज्ज्ञांनी व्यक्त केले आहे.
या दरम्यान ढगाळी वातावरणामुळे या सर्व भागांतील तापमान कमी होतील. ४ जुलै नंतर पुढच्या काही दिवसात पावसाचे प्रमाण कमी होईल. २ ते ४ जुलै मध्ये नदी-नाल्यांच्या जवळ राहणाऱ्या नागरिकांनी पुरा सारखी स्थिती उद्भविल्यास सावधगिरी बाळगावी, असे आवाहन करण्यात आले आहे.



  Print






News - Rajy | Posted : 2019-07-01






Related Photos