रानटी हत्तींचा उपद्रव सुरूच : वन विभागाच्या उपाययोजना तोकड्या


विदर्भ न्यूज एक्सप्रेस
तालुका प्रतिनिधी / कुरखेडा : गडचिरोली जिल्ह्यासह कुरखेडा तालुक्यात रानटी हत्तींच्या कळपांचा वाढता वावर सुरूच असून, त्यांच्या उपद्रवामुळे शेतकरी आणि नागरिकांमध्ये भीतीचे वातावरण निर्माण झाले आहे. हत्तींच्या कळपांकडून शेतीचे नुकसान होण्याची शक्यता वाढल्याने ग्रामीण भागातील नागरिकांमध्ये चिंतेचे वातावरण आहे. हत्तींचा बंदोबस्त करण्यासाठी वन विभागाकडून ठोस आणि प्रभावी उपाययोजना करण्यात याव्यात, अशी मागणी आता जोर धरू लागली आहे.
रानटी हत्तींचे कळप मानवी वस्त्यांच्या तसेच शेतशिवाराच्या परिसरात येत असल्याने नागरिकांच्या सुरक्षिततेचा प्रश्न निर्माण झाला आहे. हत्तींच्या हालचालींवर नियंत्रण ठेवण्यासाठी वन विभागाकडून उपाययोजना केल्या जात असल्या तरी त्या अपुऱ्या ठरत असल्याची भावना स्थानिक नागरिकांमध्ये आहे. त्यामुळे हत्तींचा वाढता उपद्रव रोखण्यासाठी दीर्घकालीन आणि कायमस्वरूपी उपाययोजना करण्याची गरज व्यक्त होत आहे.
या पार्श्वभूमीवर भाजपचे कुरखेडा तालुकाध्यक्ष तथा माजी पंचायत समिती सदस्य चांगदेव फाये यांनी मंगळवारी वनमंत्री गणेश नाईक यांच्याकडे निवेदन सादर करून रानटी हत्तींच्या समस्येकडे गांभीर्याने लक्ष देण्याची मागणी केली. हत्तींच्या कळपांचा बंदोबस्त करून शेतकरी व नागरिकांना दिलासा द्यावा, तसेच भविष्यात हत्तींच्या उपद्रवामुळे कोणतीही अनुचित घटना घडू नये यासाठी ठोस नियोजन करावे, अशी मागणी त्यांनी केली.
हत्तींचा वावर असलेल्या संवेदनशील भागांमध्ये वन विभागाची गस्त वाढविणे आवश्यक आहे. तसेच हत्तींच्या हालचालींवर सतत लक्ष ठेवण्यासाठी विशेष पथके तैनात करावीत. या पथकांनी चोवीस तास हत्तींच्या हालचालींचे निरीक्षण करून त्यांची दिशा, ठिकाण आणि संभाव्य धोका याबाबत स्थानिक नागरिकांना वेळीच माहिती द्यावी, अशी मागणी फाये यांनी निवेदनातून केली आहे. हत्तींचा कळप गावांच्या किंवा शेतशिवाराच्या दिशेने येत असल्यास संबंधित गावांना तातडीने सूचना देण्याची यंत्रणा प्रभावी करावी, अशी अपेक्षाही व्यक्त होत आहे. केवळ हत्तींचा वावर सुरू झाल्यानंतर उपाययोजना करण्याऐवजी त्यांच्या नियमित हालचालींचा अभ्यास करून संवेदनशील गावांसाठी प्रतिबंधात्मक आराखडा तयार करण्याची आवश्यकता आहे.
दरम्यान, रानटी हत्तींच्या उपद्रवामुळे शेतीचे नुकसान होण्याबरोबरच नागरिकांच्या जीवितासही धोका निर्माण होऊ शकतो. त्यामुळे वन विभागाने या समस्येकडे गांभीर्याने पाहून मनुष्य-हत्ती संघर्ष टाळण्यासाठी प्रभावी उपाययोजना राबवाव्यात, अशी मागणी शेतकरी व नागरिकांकडून होत आहे. हत्तींच्या वाढत्या उपद्रवावर कायमस्वरूपी तोडगा काढण्यासाठी शासनाने तातडीने पुढाकार घ्यावा, अशी अपेक्षा व्यक्त केली जात आहे.




Petrol Price




