श्रीलंकेत साखळी बॉम्बस्फोट : १०० हून अधिक ठार , २८० जखमी


विदर्भ न्यूज एक्सप्रेस 
वृत्तसंथा / कोलंबो( श्रीलंका ) :
आज सकाळच्या सुमारास  सहा साखळी बॉम्बस्फोटांनी श्रीलंका हादरली आहे. यातील तीन बॉम्बस्फोट हे चर्चमध्ये तर उर्वरित ३ बॉम्बस्फोट पंचतारांकित हॉटेल्समध्ये झाले आहेत. ही घटना आज सकाळी ९ वाजताच्या सुमारास घडली. या भयंकर स्फोटांमध्ये १०० हून अधिक जण तर २८० हून अधिक जण जखमी झाले आहेत. इस्टर संडेच्या दिवशी हे स्फोट घडल्याने खळबळ माजली आहे. जखमींवर उपचार सुरू असून अनेकांची प्रकृती चिंताजनक आहे. मृतांचा आकडा वाढण्याची शक्यता वर्तवण्यात येत आहे. जखमी आणि मृतांमध्ये विदेशी पर्यटकांचाही समावेश अधिक आहे.
कोलंबो बंदराजवळील सेंट अँथनी चर्च, कोच्चिकेडे चर्च, उत्तलम जवळील सॅबेस्टिअन चर्च या तीन चर्चमध्ये स्फोट झाल्याची माहिती मिळत आहे. तर किंग्ज बेरी, शांग्रिला आणि सिनामोन अशी स्फोट झालेल्या हॉटेल्सची नावं आहेत. यातील दोन बॉम्बस्फोट हे सुसाईड बॉम्बर्सने केले आहेत तर उर्वरित बॉम्बस्फोट हे बॉम्ब पेरून करण्यात आले आहेत, अशी माहिती मिळत आहे. पर्यटक आणि विदेशी नागरिक यांना लक्ष्य केल्याचं या स्फोटांमधून निदर्शनास येत आहे. बॉम्बस्फोटाची माहिती मिळताच पोलीस घटनास्थळी दाखल झाले असून पुढील तपास सुरू आहे. अद्याप या स्फोटाची जबाबदारी कोणत्याही दहशतवादी संघटनेने घेतलेली नाही. हिंदुस्थानच्या परराष्ट्र मंत्री सुषमा स्वराज यांनी कोलंबो इथल्या उच्चायुक्तांच्या संपर्कात राहून घटनेबाबत सविस्तर माहिती जाणून घेत असल्याची प्रतिक्रिया दिली आहे.

 



  Print






News - World | Posted : 2019-04-21






Related Photos