महत्वाच्या बातम्या

बालकांच्या लसीकरणासाठी नागरिकांनी सहकार्य करावे : मुख्य कार्यकारी अधिकारी रोहन घुगे

- जिल्हा टास्क फोर्स समितीची सभा

- इंद्रधनुष मोहिमेसाठी आरोग्य विभाग सज्ज

विदर्भ न्यूज एक्सप्रेस

प्रतिनिधी / वर्धा : पावसाळ्याच्या दिवसांमध्ये लहान मुलांचा आजारापासून बचाव करण्याकरीता लसीकरण करणे आवश्यक आहे. त्यासाठी मिशन इंद्रधनुष मोहिमेंतर्गत शहरी व ग्रामीण भागातील पाच वर्षाच्या आतील बालके व गरोदर मातांचे लसीकरण करण्यात येणार आहे. यासाठी नागरिकांनी सहकार्य करावे, असे आवाहन मुख्य कार्यकारी अधिकारी रोहन घुगे यांनी केले.

विशेष इंद्रधनुष मोहिम ग्रामीण व शहरी भागात तीन टप्यात राबविण्यात येणार असून या मोहिमेच्या पुर्वतयारीचा आढावा घेण्यात आला. बैठकीला जिल्हा आरोग्य अधिकारी डॉ. रा.ज. पराडकर, उपमुख्य कार्यकारी अधिकारी सुनिल मेसरे, अतिरिक्त जिल्हा आरोग्य अधिकारी डॉ. प्रविण वेदपाठक, जिल्हा माता व बाल संगोपन अधिकारी डॉ. मंगेश रेवतकर, सामान्य रुग्णालयाचे निवासी वैद्यकीय अधिकारी डॉ. दिनेश राठोड, टास्क फोर्स समितीचे सदस्य आयएमएचे डॉ. जयंत मकरंदे, आएपीचे डॉ. राजेंद्र बोरकर, आरोग्य विभागाचे जितेंद्र शिंदे, कविता टोणपे, प्रशांत आदमने, संदीप चव्हाण आदी उपस्थित होते.

मोहिमेचा पहिला टप्प ७ ते १२ ऑगस्ट, दुसरा टप्पा ११ ते १६ सप्टेंबर व तिसरा टप्पा ९ ते १४ ऑक्टोबर या कालावधीत राबविण्यात येणार असून मोहिमेच्या कालावधीत लसीकरणापासुन वंचित राहिलेले किंवा अर्धवट लसीकरण झालेल्या पाच वर्षाआतील सर्व बालके व गरोदर मातांचा शोध घेऊन अंगणवाडी केंद्रात लसीकरण करण्यात येणार आहे. यासाठी पालकांनी आपल्या बालकांचे जवळच्या अंगणवाडीमध्ये लसीकरण करुन घेण्याचे आवाहन रोहन घुगे यांनी केले आहे. नियमित लसीकरणाच्या लसीसोबतच गोवर रुबेला लस, पीसीव्ही तसेच f-llpv लस देण्यावर विशेष देण्यात येणार आहे. असेही यावेळी रोहन घुगे यांनी सांगितले.