महत्वाच्या बातम्या

पंतप्रधान नरेंद्र मोदी यांना यंदाचा लोकमान्य टिळक राष्ट्रीय पुरस्कार जाहीर

विदर्भ न्यूज एक्सप्रेस

वृत्तसंस्था / पुणे : लोकमान्य टिळक स्मारक ट्रस्ट च्या वतीने देण्यात येणारा लोकमान्य टिळक राष्ट्रीय पुरस्कार यंदा पंतप्रधान नरेंद्र मोदी यांना जाहीर करण्यात आला आहे. स्मृतिचिन्ह, मानपत्र आणि एक लाख रुपये असे पुरस्कारचे स्वरूप आहे.

लोकमान्य टिळक यांच्या एक ऑगस्ट रोजी असलेल्या पुण्यतिथीदिनी हा पुरस्कार ट्रस्टचे अध्यक्ष डॉ. दीपक टिळक यांच्या हस्ते प्रदान करण्यात येणार आहे. ट्रस्टचे विश्‍वस्त रोहित टिळक यांनी सोमवारी पत्रकार परिषदेत या पुरस्काराची माहिती दिली. हा कार्यक्रम मुकुंदनगर येथील टिळक महाराष्ट्र विद्यापीठाच्या आवारात होणार आहे. पंतप्रधान नरेंद्र मोदी हे लोकमान्य टिळक राष्ट्रीय पुरस्कार प्रदान करण्यात येणारे पदावरील पहिले पंतप्रधान ठरणार आहेत.

हा पुरस्कार दिवंगत पंतप्रधान इंदिरा गांधी यांनाही जाहीर झाला होता मात्र तो प्रदान करण्याआधीच इंदिरा गांधी यांची हत्या झाल्यामुळे त्यांना तो मरणोत्तर पुरस्कार प्रदान करावा लागला होता. डॉ. मनमोहन सिंग आणि अटलबिहारी वाजपेयी हे माजी पंतप्रधान या पुरस्काराचे मानकरी ठरले होते, मात्र त्यावेळी ते पंतप्रधान पदावर नव्हते.

मोदी, पवार पुण्यामध्ये एकाच मंचावर -

या पुरस्कार सोहळ्याला प्रमुख पाहुणे म्हणून राष्ट्रवादी कॉंग्रेसचे अध्यक्ष शरद पवार उपस्थित राहणार आहेत. त्यामुळे सध्या राज्यात बदललेल्या राजकीय परिस्थितीच्या पार्श्‍वभूमीवर या दोघांचे एकत्र येणे हा औत्सुक्‍याचा विषय आहे. याशिवाय या कार्यक्रमाला राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, ट्रस्टचे विश्‍वस्त सुशीलकुमार शिंदे हे देखील उपस्थित राहणार आहेत. त्यामुळे शरद पवार आणि अजित पवार हे काका पुतण्यादेखील राष्ट्रवादीतील राजकीय घटना नाट्यानंतर पहिल्यांदाच एका व्यासपीठावर येणार आहेत.