१ एप्रिल पासून घरगुती गॅस महागणार


वृत्तसंस्था / नवीदिल्ली :  आगामी आर्थिक वर्ष १ एप्रिल पासून  सीएनजी, पीएनजी आणि घरगुती गॅसच्या दरात वाढ होण्याची शक्यता आहे. सूत्रांनी दिलेल्या माहितीनुसार नैसर्गिक वायूच्या किमतीत १८ टक्के वाढ होण्याची शक्यता आहे. आंतरराष्ट्रीय बाजारात निर्माण झालेल्या मागणीमुळे नैसर्गिक वायूच्या दरांमध्ये वाढ होण्याची शक्यता आहे. सध्याच्या गॅस धोरणानुसार केंद्र सरकार दर सहा महिन्यांनी नैसर्गिक वायूच्या किमतींचा आढावा घेते. गेल्या वर्षभरात नैसर्गिक वायूच्या किमतीत दोन वेळा (५.९ टक्के आणि ९.८ टक्के) वाढ झाली. मात्र, लवकरच आणखी वाढ होण्याची शक्यता आहे. त्यामुळे सर्वसामान्यांच्या डोकेदुखीत वाढ होण्याची शक्यता आहे. 
पेट्रोलियम मंत्रालयाने दिलेल्या माहितीनुसार देशांतर्गत बाजारात नैसर्गिक वायूच्या किमती आंतरराष्ट्रीय बाजारानुसार ठरतात. त्यामध्ये कोणताही सरकारी हस्तक्षेप करता येत नाही. नोव्हेंबर, डिसेंबरमध्ये कच्च्या तेलाच्या किमतीत घट नोंदवल्यानंतर सातत्याने दरवाढीचा सिलसिला सुरूच आहे. नव्या वर्षाच्या सुरुवातीलाच कच्च्या तेलाच्या किमतीत सात टक्क्यांची वाढ नोंदविण्यात आली होती. कच्च्या तेलाच्या वाढीचा परिणाम घरगुती गॅसच्या किमतीवरही होतो. 



  Print






News - World | Posted : 2019-03-22






Related Photos