महत्वाच्या बातम्या

श्री संत रोहिदास चर्मोद्योग व चर्मकार विकास महामंडळाच्या योजनांचा लाभ घेण्याचे आवाहन

विदर्भ न्युज एक्सप्रेस
प्रतिनिधी / नागपूर : ३ जुलै २०२३ श्री संत रोहिदास चर्मोद्योग व चर्मकार विकास महामंडळामार्फत व्यवसायासाठी ५० टक्के अनुदान योजना व भांडवल योजना राबविली जाते. महामंडळाच्या नागपूर जिल्हा कार्यालयात सन २०२३-२४ या आर्थिक वर्षासाठी उद्दिष्ट प्राप्त झाले असून योजनांचा लाभ घेण्यासाठी विहीत नमुन्यातील प्रस्ताव महामंडळाच्या जिल्हा कार्यालयात सादर करावा. यातील चांभार, मोची, ढोर व होलार समाजातील बेरोजगार युवक व युवती तसेच होतकरु गरजू अर्जदारांनी योजनेचा जास्तीत जास्त लाभ घ्यावा, असे आवाहन महामंडळाचे जिल्हा व्यवस्थापक एस. एन. ढगे यांनी केले आहे.

महामंडळाच्या अनुदान योजनेतून राष्ट्रीयकृत बँकेमार्फत ५० हजार रूपयापर्यंत गुंतवणूक असणाऱ्या व्यवसायासाठी अर्थसहायय् दिले जाते. त्यामध्ये १० हजार अनुदान म्हणून देण्यात येते.५० हजार ते ५ लाख रुपयांपर्यंत प्रकल्प गुंतवणूक असणाऱ्या कोणत्याही व्यवसायासाठी बिजभांडवल योजनेअंतर्गत राष्ट्रीयकृत बँकेमार्फत कर्जपुरवठा सवलतीच्या व्याजदराने पुरविण्यात येतो. या योजनेंतर्गत बँकेने मंजुर केलेल्या कर्जापैकी ७५ टक्के रक्कम ही राष्ट्रीयकृत बँकेमार्फत देण्यात येते. ५ टक्के रक्कम लाभार्थ्यानी स्वतःचा सहभाग म्हणून जमा करावयाची असते. उर्वरीत २० टक्के रक्कम महामंडळ बिज कर्ज म्हणून देते, त्यापैकी १० हजार रुपये अनुदान म्हणून असते.

याव्यतिरीक्त महामंडळाकडून मुदती कर्ज योजना २ लाख रुपये, लघुऋण योजना – ५० हजार महिला समृध्दी योजना ५० हजार रुपयांपर्यंत महामंडळाकडून वर्ष २०२३-२४ मध्ये सुरू करण्यात आलेल्या आहेत. तसेच यावर्षापासून वरील तीनही योजनांची प्रकल्प मर्यादा वाढविण्यात आलेली आहे.

मुदती कर्ज योजना ५ लाखापर्यंत, लघुऋण योजना १.४० पर्यंत, महिला समृद्धी योजना १.४० पर्यंत, महिला अधिकारीता योजना रु.५ लाख अशा ४ योजना वर्ष २०२३-२४ साठी सुरू करण्यात आल्या आहेत.

बँकेमार्फत तसेच महामंडळामार्फत राबविल्या जाणाऱ्या योजनांसाठी चांभार समाजात अंतर्भाव असणा-या चांभार मोची, ढोर व होलार समाजातील अर्जदाराकडून विविध व्यवसायासाठी कर्ज प्रस्ताव मागविण्यात येत आहे. या समाजातील लाभ घेवू इच्छिणाऱ्या अर्जदारांनी यापूर्वी महामंडळाच्या कोणत्याही योजनांचा लाभ घेतलेला नसावा. तसेच अर्जदाराने मंडळाच्या नियमाप्रमाणे आवश्यक त्या कागदपत्रांची पूर्तता करून कर्ज प्रस्ताव तीन प्रतीत महामंडळाचे जिल्हा कार्यालय, डॉ. साहेब आंबेडकर सामाजिक न्याय भवन, शासकीय आय टी आय समोर, साउथ अंबाझरी रोड, नागपूर येथे सादर करावेत.