महत्वाच्या बातम्या

लोकमान्य विद्यालय तथा कनिष्ठ महाविद्यालयाच्या प्राचार्या आशालता सोनटक्के यांना भावपूर्ण निरोप

विदर्भ न्यूज एक्सप्रेस

तालुका प्रतिनिधी / भद्रावती : येथील लोकसेवा मंडळ भद्रावती द्वारा संचालित लोकमान्य विद्यालय तथा कनिष्ठ महाविद्यालयाच्या प्राचार्या आशालता सोनटक्के यांना त्यांच्या सेवानिवृत्तीनिमित्य एका समारंभात भावपूर्ण निरोप देण्यात आला.

या समारंभाच्या अध्यक्षस्थानी लोकसेवा मंडळाचे अध्यक्ष चंद्रकांत गुंडावार होते. तर प्रमुख अतिथी म्हणून लोकसेवा मंडळाचे सचिव नामदेवराव कोल्हे, सहसचिव अमित गुंडावार, संचालक सेवानिवृत्त प्राचार्य गोपालराव ठेंगणे, सदस्य दत्तात्रय गुंडावार, सत्कारमूर्ती प्राचार्या आशालता सोनटक्के, उपप्राचार्य सचिन सरपटवार, पर्यवेक्षक रुपचंद धारणे, लोकमान्य ज्ञानपीठाच्या प्राचार्या पूनम ठावरी आदी मान्यवर मंचावर उपस्थित होते.

सर्वप्रथम सरस्वतीच्या प्रतिमेचे पूजन करून चंद्रकांत गुंडावार यांच्या हस्ते समारंभाचे उद्घाटन करण्यात आले. त्यानंतर अनेक वक्त्यांनी प्राचार्या सोनटक्के यांच्या कार्याचा गुणगौरव केला. तसेच यावेळी लोकसेवा मंडळाचे अध्यक्ष चंद्रकांत गुंडावार यांच्या हस्ते सोनटक्के यांचा शाल, श्रीफळ, पुष्पगुच्छ, साडी-चोळी व भेट वस्तू देऊन सत्कार करण्यात आला. तसेच लोकमान्य विद्यालय व कनिष्ठ महाविद्यालयातर्फे उप्राचार्य सचिन सरपटवार यांच्या हस्ते सोनटक्के यांचा शाल, श्रीफळ, पुष्पगुच्छ, साडी-चोळी व भेट वस्तू देऊन सत्कार करण्यात आला. याप्रसंगी लोकसेवा कर्मचारी सहकारी पतसंस्था, लोकमान्य ज्ञानपीठ आणि शालेय पोषण आहार महिला कर्मचारी यांच्या तर्फेही सोनटक्के यांचा सत्कार करण्यात आला.

यावेळी प्राचार्या सोनटक्के यांनी सर्व शिक्षक व शिक्षकेत्तर कर्मचारी यांनी केलेल्या सहकार्याबद्दल कृतज्ञता व्यक्त केली. कार्यक्रमाचे प्रास्ताविक पर्यवेक्षक रुपचंद धारणे यांनी केले. संचालन शिक्षिका प्राजक्ता चिखलीकर यांनी केले. तर आभार शिक्षिका मीनाक्षी वासाडे यांनी मानले. कार्यक्रमाला विद्यालयाचे शिक्षक, शिक्षकेतर कर्मचारी, माजी प्राचार्य उपस्थित होते.