राज्यातील ११ लाख ९९ हजार ५२७ तरूण मतदार प्रथमच बजावणार मतदानाचा हक्क


- राज्यात ८ कोटी ७३ लाख मतदार
विदर्भ न्यूज एक्सप्रेस 
प्रतिनिधी / गडचिरोली  :
  लोकसभा निवडणुकीत  राज्यातील  ११ लाख ९९ हजार ५२७ तरूण मतदार प्रथमच मतदानाचा हक्क बजावणार आहेत. केंद्रीय निवडणूक आयोगाने जाहीर केलेल्या आकडेवरीत ही माहिती पुढे आली आहे. 
महाराष्ट्रासह देशात होऊ घातलेला लोकशाहीचा सर्वोच्च उत्सव १७ व्या लोकसभेच्या निवडणुकीत सहभागी होण्यासाठी महाराष्ट्रातील मतदार सज्ज झाले आहेत. महाराष्ट्रात  मतदारांची  एकूण संख्या ८ कोटी ७३ लाख २९ हजार ९१० आहे. राज्यात १८ ते १९ वर्ष वयोगटात अर्थात प्रथमच मतदार म्हणून नोंदणी करणाऱ्या तरूणांची संख्या ११ लाख ९९ हजार ५२७ आहे. हे तरुण प्रथमच लोकसभा निवडणुकीसाठी मतदानाचा हक्क बजावणार आहेत. देशात १८ ते १९ वर्ष वयोगटातील मतदारांची एकूण संख्या १ कोटी  ५० लाख ६४ हजार ८२४ आहे.  

४ कोटी  १६ लाख महिला मतदार

मतदार नोंदणीमध्ये राज्यात महिला मतदारही आघाडीवर आहेत. राज्यातील पुरुष व महिला मतदारांचे प्रमाण एक हजार पुरुष नोंदणीकृत मतदारामागे नोंदणीकृत ९११ महिला मतदार असे आहे. राज्यात एकूण ८ कोटी ७३ लाख २९ हजार ९१० नोंदणीकृत मतदार आहेत. यापैकी  ४ कोटी ५७ लाख १ हजार ८७७ पुरुष तर  ४ कोटी १६ लाख २५ हजार ९५० महिला मतदार आहेत. राज्यात २ हजार ८३ नोंदणीकृत तृतीयपंथी मतदार आहेत.  
एक हजार लोकसंख्येमागे मतदार नोंदणीचे प्रमाणही राज्यात उल्लेखनीय आहे. राज्यात एक हजार लोकसंख्येमागे ७१० नोंदणीकृत मतदार आहेत. तर राज्यात एकूण ४८ लोकसभा जागांसाठी चार टप्प्यात  एकूण ९५ हजार ४७५ मतदान केंद्रावर मतदान घेण्यात येणार आहे.      



  Print






News - Gadchiroli | Posted : 2019-03-16






Related Photos