'चौकीदार चोर है' या विधानावर सुरक्षारक्षकांचा आक्षेप, राहुल गांधी यांच्या विरोधात पोलिसांत धाव


वृत्तसंस्था / मुंबई :  काँग्रेस अध्यक्ष राहुल गांधी यांच्या विरोधात राज्यातील सुरक्षारक्षकांनी पोलिसांत धाव घेतली आहे. राहुल गांधी यांच्या 'चौकीदार चोर है' या विधानावर सुरक्षारक्षकांचा आक्षेप असून यामुळे आमचा अपमान होत असल्याची तक्रार त्यांनी वांद्रे-कुर्ला पोलिस ठाण्यात केली आहे. राहुल गांधी यांच्याविरोधात गुन्हा दाखल करा, अशी मागणी त्यांनी या तक्रारअर्जाद्वारे केली आहे. 
राहुल गांधी प्रत्येक ठिकाणी तसेच सभांमध्ये 'चौकीदार चोर है' असे विधान करून पंतप्रधान नरेंद्र मोदी यांच्यावर टीका करत आहेत. हा सर्व सुरक्षारक्षकांचा अपमान असल्याचा आरोप महाराष्ट्र राज्य सुरक्षा रक्षक युनियनने केला आहे. एमएमआरडीए मैदानावर नुकत्याच झालेल्या काँग्रेसच्या सभेमध्येही गांधी यांनी हे विधान केले होते. त्याआधारे गांधी यांच्यावर गुन्हा दाखल करावा, अशी मागणीही संघटनेचे अध्यक्ष संदीप घुगे यांनी केली आहे. संघटनेच्या वतीने वांद्रे-कुर्ला कॉम्प्लेक्स पोलिस ठाण्यात दाखल केलेल्या तक्रारअर्जात राहुल गांधी यांच्या या वक्तव्यामुळे सुरक्षारक्षकांच्या भावना दुखावल्या जात असल्याचे घुगे यांनी तक्रार अर्जात नमूद केले आहे. राहुल गांधी यांनी यापुढे हे विधान करू नये, असेही त्यांनी म्हटले आहे. 

 



  Print






News - Rajy | Posted : 2019-03-13






Related Photos