भद्रावती तहसील कार्यालयातील नायब तहसीलदार, तलाठी लाचलुचपत प्रतिबंधक विभागाच्या जाळ्यात


- रेतीच्या ट्रॅक्टरवर कारवाई न करण्यासाठी घेतली पाच हजारांची लाच
विदर्भ न्यूज एक्सप्रेस
प्रतिनिधी / चंद्रपूर :
रेती वाहतूक करणारे ट्रॅक्टर पकडल्यानंतर कार्यवाही न करता सोडून देण्यासाठी ५ हजारांची लाच स्वीकाल्याप्रकरणी भद्रावती तहसील कार्यालयातील नायब तहसीलदार आणि तलाठ्यावर लाचलुचपत प्रतिबंधक विभागाने कारवाई केली आहे.
गौतम परसराम शंभरकर (५५) असे नायब तहसीलदाराचे व खुशाल गोविंदराव मस्के (४६) असे लाचखोर तलाठ्याचे नाव आहे. तक्रारदार  शिवाजीनगर भद्रावती येथील रहिवासी आहे. त्यांचा बिल्डींग मटेरियल वाहतूकीचा व्यवसाय आहे. पिंपरी घाटावरून काल १ मार्च रोजी त्यांचा ट्रॅक्टर रेती भरून येत असताना नायब तहसीलदार शंभरकर व तलाठी मस्के यांनी ट्रॅक्टर थांबविला व कोणतीही कार्यवाही न करता ट्रॅक्टर सोडून देण्यासाठी ५ हजार रूपयांची मागणी केली. याबाबत एसीबीकडे तक्रार दाखल करण्यात आली. आज २ मार्च रोजी सापळा रचून कारवाई करण्यात आली. दोघांवरही पोलिस ठाणे रामनगर चंद्रपूर शहर येथे लाचलुचपत प्रतिबंधक १९८८ संशोधन अधिनियम २०१८ अन्वये गुन्हा दाखल करण्यात आला आहे.
सदर कारवाई पोलिस उपायुक्त, पोलिस अधीक्षक श्रीकांत धिवरे यांच्या मार्गदर्शनात डी.एम. घुगे, पोलिस हवालदार मनोहर एकोणकर, नापोकाॅ महेश मांढरे, संतोष येलपुलवार, रवी ढेंगळे, अजय बागेसर, चालक शिपाई राहुल ठाकरे यांनी केली आहे.

 



  Print






News - Chandrapur | Posted : 2019-03-02






Related Photos