महत्वाच्या बातम्या

असंघटीत क्षेत्रातील कामगारांनी ई-श्रम पोर्टलवर नोंदणी करावी : जिल्हाधिकारी नागपूर यांचे आवाहन

विदर्भ न्यूज एक्सप्रेस

प्रतिनिधी / नागपूर : केंद्र शासनाची ई-श्रम कार्ड योजना कामगारांच्या कल्याणासाठी राबविण्यात येणार असून, योजनमार्फत कामगारांना आर्थिक व सामाजिक सुरक्षा देण्याच्या शासनाचा प्रयत्न आहे. सदर योजनेमार्फत सद्यस्थितीत कामगारांना सामाजिक सुरक्षा व कल्याणकारी योजनांचा लाभ देण्याचा शासनाचा प्रयत्न आहे. या योजनेव्दारे शासन कामगारांना २ लाख रुपये पर्यंतचा विमा उतरविणार आहे. कामगारांचा अपघातात मृत्यु तसेच कायमचे अपंगत्व आल्यास २ लाख रुपये किंवा अंशतः अपंगत्व आल्यास १ लाख रुपये आर्थिक मदत केंद्र शासनामार्फत कामगारांना या योजनेमार्फत मिळणार आहे. असंघटीत क्षेत्रातील कामगारांनी ई-श्रम पोर्टलवर नोंदणी करुन योजनेचा लाभ घ्यावा, असे आवाहन जिल्हाधिकारी विपीन इटनकर यांनी केले आहे.

यानुषंगाने विविध व्यवसाय करणारे जसे, बिडी कामगार, मच्छीमार, सुतार सेरीकल्चर, भाजी आणि फळ विक्रेते, वृत्तपत्र विक्रेते, यंत्रमाग कामगार यांच्यासारख्या विविध ३०० व्यवसाय गटातील असंघटीत कामगारांचा राष्ट्रीय डेटाबेस तयार करण्यात येत आहे. असंघटीत कामगारांच्या राष्ट्रीय डेटाबेसच्या आधारावर असंघटीत कामगारांसाठी सामाजिक सुरक्षा योजना अंमलात आणल्या जातील. असंघटीत कामगार ज्यांचे वय १६ ते ५९ दरम्यान आहे, कामगार हा आयकर भरत नसेल व कामगार हा भविष्य निर्वाह निधी, राज्य कर्मचारी विमा योजनेचा सभासद नाही, अशा कामगारांनी आपले आधार कार्ड, राष्ट्रियकृत बँकेचे पासबुक व आपला सक्रिय असलेला मोबाईल क्रमांकाची नोंदणी करावी. ही नोंदणी मोबाईल नंबर आधार कार्डशी लिंक असलेल्या कामगारांनी स्वतः नागरी सुविधा केंद्र किंवा कामगार सुविधा केंद्र येथे अथवा eshram.gov.in या वेब पोर्टलवर नोंदणी करावी.