महत्वाच्या बातम्या

वाळू खरेदी विक्रीची नोंदणी प्रक्रिया सुलभ

- सेतू केंद्रांना मार्गदर्शक सुचना जारी

विदर्भ न्यूज एक्सप्रेस

प्रतिनिधी / वर्धा : शासनाच्या नवीन वाळू धोरणाप्रमाणे जिल्ह्यात वाळू डेपो सुरु करण्यात आले असून तेथून संबंधीतांना स्वस्त दरात वाळू उपलब्ध करुन दिली जात आहे. वाळू खरेदी विक्रीची प्रक्रिया सुलभ व सुटसुटीत असून जिल्हा प्रशासनाच्यावतीने विक्रीसाठी सेतू केंद्राना मार्गदर्शक सुचना जारी करण्यात आल्या आहे.

वाळूसाठी नागरिकांना नजीकच्या कोणत्याही सेतू केंद्रावर जाऊन नोंदणी करावयाचे आहे. त्यानंतर घरकुलासाठी किंवा अन्य कोणत्या बांधकाम प्रकल्पासाठी वाळूची आवश्यकता आहे. त्याची नोंदणी करावी लागेल. त्यानंतर वाळूची बुकींग व त्यासाठी आवश्यक शुल्क भरावे लागेल. त्यानंतर संबंधीत वाळू डेपोच्या ठिकाणी वाहतुक पावती तयार केली जाईल.

यासाठी लाभार्थ्यांना नोंदणी करीता आधारकार्ड, घरकुल प्रमाणपत्र इत्यादी कागदपत्र दयावे लागतील. नोंदणीसाठी मोबाईल क्रमांक आवश्यक असल्याने सेतू केंद्रावर जातांना लाभार्थ्यांने मोबाईल सोबत ठेवावा. घरकुल योजनेतील लाभार्थ्यांना पाच ब्रास वाळू मोफत दिली जाणार आहे. सामान्य नागरिकांसाठी वाळू विक्रीचा दर ६७७ रुपये प्रति ब्रास असून या किमतीने १० ब्रास इतक्या मर्यादेपर्यंत वाळू दिली जाईल.

घरकुल लाभार्थी व इतर नागरिकांना वाळूच्या नोंदणीसाठी २५ रुपये नोंदणी शुल्क भरावे लागतील. नोंदणी झाल्यानंतर बुकींग आयडी असलेली पावती उपलब्ध होईल. सदर पावती वाळू डेपो मॅनेजरला दाखविल्या नंतर डेपोमधून वाहतुक पावती प्राप्त होईल. डेपोपासुन ते बांधकामाच्या ठिकाणापर्यंतचा खर्च वाळू नोंदणी केलेल्या व्यक्तीला करावा लागणार आहे.

वाळू डेपोपासुन वाळूची वाहतुक करणाऱ्या वाहनांची महाखनिज या संकेतस्थळावर सेतू केंद्रामार्फत नोंदणी केल्या जाणार आहे. या वाहनांवर जीपीएस यंत्र बसविणे आवश्यक राहणार आहे, असे अप्पर जिल्हाधिकारी नरेंद्र फुलझेले यांनी कळविले आहे.