महिला सक्षमीकरणाला ‘हिरकणी महाराष्ट्राची’ स्पर्धेमुळे चालना : सुरेश प्रभू


विदर्भ न्यूज एक्सप्रेस 
प्रतिनिधी / नागपूर : 
राज्याने मागील चार वर्षात अनेक क्षेत्रात प्रगती केली आहे. तळागाळातील माणसाच्या विकासासाठी अनेक योजना राज्यात राबविण्यात येत आहे. राज्यातील बचतगटातील महिलांनी सुध्दा विकासात आपले योगदान दिले आहे. हिरकणी महाराष्ट्राची या स्पर्धेतून महिला सक्षमीकरणाला चालना मिळण्यास मदत होईल, असे प्रतिपादन केंद्रीय वाणिज्य व उद्योजकता मंत्री सुरेश प्रभू यांनी केले.
   मुंबई येथून आज व्हिडीओ कॉन्फरन्सद्वारे राज्यातील सर्व जिल्हाधिकारी, जि. प. मुख्य कार्यकारी अधिकारी, जिल्हा ग्रामीण विकास यंत्रणेचे प्रकल्प संचालक, जिल्हा नियोजन अधिकारी, जिल्हा कौशल्य विकास, रोजगार व उद्योजकता मार्गदर्शन केंद्राचे सहायक संचालक, जिल्हा उद्योग केंद्राचे महाव्यवस्थापक यांचे प्रतिनिधी आणि जिल्हा व्यवसाय शिक्षण व प्रशिक्षण अधिकारी यांच्याशी श्री. प्रभू यांनी संवाद साधला.     
यावेळी त्यांच्या हस्ते ‘हिरकणी महाराष्ट्राची’ व ‘डिस्ट्रिक्ट बिझनेस प्लॅन कॉम्पिटिशन’ या स्पर्धांचा शुभारंभ करण्यात आला. यावेळी त्यांच्या समवेत राज्याचे कौशल्य व उद्योजकता विकास मंत्री संभाजी पाटील- निलंगेकर, राज्य महिला आयोगाच्या अध्यक्ष अॅड. विजया रहाटकर, कौशल्य विकास व उद्योजकता विभागाचे प्रधान सचिव असीम गुप्ता हे प्रामुख्याने उपस्थित होते.
 केंद्रीय मंत्री सुरेश प्रभू म्हणाले, राज्यातील सर्वसामान्य जनतेचे प्रश्न सुटावेत आणि राज्य प्रगतीकडे जावे, यासाठी मुख्यमंत्री देवेंद्र फडणवीस यांच्या संकल्पनेतून ‘वॉररुम’ची निर्मिती केली आहे. हिरकणी महाराष्ट्राची हा अत्यंत स्तुत्य असा उपक्रम आहे. केंद्र सरकार सुध्दा यासाठी मदत करणार आहे. राज्यात अनेक उद्योगशील, कल्पक व्यक्ती आहेत. त्यांच्या कल्पनेतून राज्याला विकासाची गती मिळणार आहे. स्वतःचा उद्धार करण्यासाठी प्रत्येकाने पुढे आले पाहिजे. महात्मा गांधी यांनी ग्रामविकासाचे स्वप्न बघितले. ग्रामविकासाची सांगड या उपक्रमातून घालण्यात येत आहे. भारत हा कृषिप्रधान देश आहे. शेतकऱ्यांचा विकास झाला तर देशाचा विकास होईल, असेही ते म्हणाले.
 या स्पर्धेतून बचत गटांच्या महिलांनी पुढे यावे, असे सांगून श्री. प्रभू म्हणाले, त्यांच्यातील असलेल्या कल्पनेला पूर्णत्वास नेण्यासाठी महिलांनी व्यवसायासाठी पुढाकार घेणे आवश्यक आहे. हा कार्यक्रम सर्वांसाठी मार्गदर्शक ठरणार आहे. यामधून चांगल्या कल्पना जागतिकस्तरावर सुध्दा नेता येईल. भारतीय लघु उद्योग विकास बँक (सीडबी) कडून कर्जपुरवठा करण्यास महिलांना मदत करण्यात येईल. विकासाचा दर वाढला पाहिजे, यासाठी राज्याचा विकास होणे आवश्यक आहे. हा विकास करायचा असेल तर जिल्ह्याचा विकास झाला पाहिजे. महिला बचतगटांना प्रोत्साहन देणे हा हिरकणी योजनेचा मुख्य उद्देश आहे. या योजनेअंतर्गत प्रत्येक तालुक्यातील अभिनव प्रयोग करणाऱ्या दहा बचतगटांची निवड केली जाणार आहे. या बचतगटांना आर्थिक मदत केली जाणार आहे. याशिवाय उत्तम काम करणाऱ्या बचतगटांना पुरस्कारही प्रदान केले जाणार आहे. राज्यातील महिलांचे कल्याण करण्यासाठी ही स्पर्धा आयोजित करण्यात येत असल्याचे त्यांनी सांगितले.
   कौशल्य व उद्योजकता विकास मंत्री संभाजी पाटील- निलंगेकर म्हणाले, महिलांचा उद्योग क्षेत्रात मोठा सहभाग आहे. महिला उद्योजकांना प्रोत्साहन देण्याचे काम ‘हिरकणी महाराष्ट्राची’ या स्पर्धेतून करण्यात येणार आहे. या स्पर्धेतून ग्रामीण भागातील महिला उद्योजक तयार करण्यास मदत होणार आहे. २४ फेब्रुवारी पासून बचत गटातील महिलांनी या स्पर्धेत आपला सहभाग नोंदवावा, असे आवाहनही  त्यांनी याप्रसंगी केले.
राज्य महिला आयोगाच्या अध्यक्ष ॲड. विजया रहाटकर म्हणाल्या, महिला सक्षमीकरणासाठी ही अत्यंत चांगली योजना आहे. महिलाही आर्थिक सक्षम झाली पाहिजे. यासाठी ही योजना महत्वपूर्ण आहे. ग्रामीण भागातील प्रतिभावान महिलांना या स्पर्धेतून संधी मिळणार आहे. बचतगटांच्या महिलांना उद्योग व्यवसायासाठी चालना देवून ही स्पर्धा महिलांना एक उद्योजक म्हणून पुढे आणण्यास हातभार लावणार आहे. ग्रामीण भागातील महिला मोठ्या संख्येने या स्पर्धेत सहभागी होतील, अशी अपेक्षाही त्यांनी यावेळी व्यक्त केली.  प्रास्ताविक कौशल्य विकास व उद्योजकता विभागाचे प्रधान सचिव असीम गुप्ता यांनी केले.
 दीनदयाल उपाध्याय ग्रामीण कौशल्य योजनेअंतर्गत नागपूर जिल्हयातील २०४७ युवकांनी कौशल्य विकास प्रशिक्षणासाठी नोंदणी केली आहे. त्यापैकी १४५७ युवकांना कौशल्य विकासातंर्गत प्रशिक्षण देण्यात आले आहे. यापैकी ११८५ युवकांना रोजगार उपलब्ध झाला आहे. उर्वरित २७९ युवकांना येत्या मार्च २०१९ अखेरपर्यंत रोजगार प्राप्त होईल. नागपूर जिल्हयात दीनदयाल उपाध्याय ग्रामीण कौशल्य योजनेअंतर्गत एकूण १८ संस्था काम करीत असून त्याअंतर्गत युवकांना कौशल्य विषयक प्रशिक्षण देणे, त्यांना खानपान तसेच राहण्याची सुविधा पुरविण्यात येत असून रोजगाराची संधी उपलब्ध करुन देण्याचे काम केले जात असल्याची माहिती अतिरिक्त मुख्य कार्यकारी अधिकारी अंकुश केदार यांनी दिली.
  कौशल्य विकास उद्योजकता केंद्र, नागपूर अंतर्गत प्रमोद महाजन कौशल्य विकास अभियानातंर्गत जिल्हा वार्षिक योजनेतून सध्या नागपूर जिल्हयात १ हजार २० युवकांना कौशल्य विकासाचे प्रशिक्षण दिले आहे. यामध्ये बँकींग, नर्सिंग, कॅम्प्युटर, सोलर ऊर्जा तसेच इतर आवश्यक प्रशिक्षणांचा समावेश आहे. सध्या प्रशिक्षण देणाऱ्या ३५ बॅचेस सुरु आहेत. रोजगार मेळाव्यातून आतापर्यंत ५  हजार ५०० युवकांना रोजगार प्राप्त झाला असल्याची माहिती कौशल्य विकास विभाग, नागपूरचे सहाय्यक संचालक प्रविण खंडारे यांनी यावेळी दिली.
नागपूर जिल्हाधिकारी कार्यालयातून व्हिडिओ कॉन्फरन्सद्वारे आयोजित या कार्यक्रमामध्ये निवासी उपजिल्हाधिकारी रविंद्र खजांजी, उपसंचालक डी. एम. गोस्वामी, कौशल्य विकास अधिकारी पी.बी. जाधव, सहाय्यक जिल्हा नियोजन अधिकारी संजय पाठक, जिल्हा ग्रामीण विकास यंत्रणेचे प्रकल्प संचालक मकरंद नेटके सहभागी झाले होते.



  Print






News - Nagpur | Posted : 2019-02-09






Related Photos