कर्ज योजनेसाठी अर्ज करण्याचे आवाहन
विदर्भ न्यूज एक्सप्रेस
प्रतिनिधी / नागपूर : शबरी आदिवासी वित्त व विकास महामंडळ शाखा कार्यालय नागपूर अंतर्गत मुख्य कार्यालय नाशिकमार्फत राबविण्यात येणाऱ्या कर्ज योजनेकरीता नागपूर व वर्धा जिल्ह्याकरीता लक्षांक प्राप्त झाला आहे. या कर्ज योजनेत महामंडळाचा 95 टक्के सहभाग तर लाभार्थ्यांचा 5 टक्के सहभाग राहणार आहे. या योजनेसाठी विहीत नमुन्यातील अर्ज शाखा कार्यालय नागपूर शबरी आदिवासी वित्त व विकास माहामंडळ कार्यालय, आदिवासी विकास भवन, 2 रा माळा, गिरीपेठ येथे उपलब्ध आहेत.
व्यवसायाचे प्रस्ताव संपुर्ण कागदपत्रासह 30 मे 2023 या तारखेपर्यंत जवळच्या शाखेत कार्यालयीन वेळेत सादर करावे. या मुदतीनंतर आलेले प्रस्ताव मुख्यालयाचे सुचनेनुसार स्विकारले जाणार नाहीत.
महिला सशक्तीकरण योजना (2 लक्ष रु.) बचतगट योजना (5 लक्ष) कृषी आणि संलग्न व्यवसाय (2 लक्ष), हॅाटेल ढाबा व्यवसाय (5 लक्ष), स्पेअर पार्ट/ऑटो वर्कशॉप (5 लक्ष), वाहन व्यवसाय (10 लक्ष), लघु उद्योग व्यवसाय (3 लक्ष) असा एकूण 36 लक्षांक प्राप्त झाला असून उद्दिष्टाच्या प्रमाणात अंतिम मंजुरीसाठी सादर करावयाचे आहे. नागपूर व वर्धा जिल्ह्यातील इच्छूक लाभार्थ्यांनी या योजनेचा लाभ घेण्याचे आवाहन शबरी आदिवासी वित्त विकास महामंडळामार्फत करण्यात आले आहे.
News - Nagpur