२९ जानेवारीपासून राज्यस्तरीय क्रीडा स्पर्धा , १ हजार ७५७ खेळाडू सहभागी होणार


- आदिवासी विकासमंत्री ना. विष्णू सवरा यांच्याहस्ते होणार उद्घाटन
विदर्भ न्यूज एक्सप्रेस
 प्रतिनिधी / गडचिरोली :
आदिवासी विकास विभागाच्या राज्यस्तरीय क्रीडा संमेलनाचे आयोजन २९ जानेवारीपासून करण्यात आले आहे. गडचिरोली येथील जिल्हा प्रेक्षागार मैदानावर तीन दिवसीय क्रीडा स्पर्धांच्या या महासंग्रामात राज्यातील शासकीय, अनुदानित आश्रमशाळांमधील १ हजार ७५७ आदिवासी खेळाडू आपले कौशल्य दाखविणार आहेत.
क्रीडा संमेलनाचे उद्घाटन २९ जानेवारी रोजी सकाळी ९ वाजता आदिवासी विकास मंत्री ना. विष्णू सवरा यांच्याहस्ते होणार आहे. अध्यक्षस्थानी आदिवासी विकास व वने राज्यमंत्री तथा गडचिरोली जिल्ह्याचे पालकमंत्री ना. राजे अम्ब्रीशराव महाराज आत्राम राहतील. प्रमुख अतिथी म्हणून जि.प. अध्यक्षा योगिताताई भांडेकर, खासदार अशोक नेते, विधान परिषद सदस्य रामदास आंबटकर, विधान परिषद सदस्य नागो गाणार, विधान परिषद सदस्य अनिल सोले, आमदार डाॅ. देवराव होळी, आ. कृष्णा गजबे, नगराध्यक्षा योगिताताई पिपरे आदी मान्यवर उपस्थित राहतील.
विशेष अतिथी म्हणून राज्याच्या आदिवासी विकास विभागाच्या प्रधान सचिव मनिषा वर्मा, नागपूर विभागीय आयुक्त संजीव कुमार, जिल्हाधिकारी शेखर सिंह, विशेष आमंत्रित म्हणून एशियन गेम चॅम्पीयन, अर्जून पुरस्कार प्राप्त ऑलीम्पिक धावपटू ललिता बाबर उपस्थित राहणार आहेत.
बक्षिस वितरण व समारोपीय कार्यक्रम ३१ जानेवारी रोजी सायंकाळी ५ वाजता आयोजित करण्यात आला आहे. आदिवासी विकास मंत्री ना. विष्णू सवरा यांच्याहस्ते बक्षिस वितरण होणार आहे. याप्रसंगी आदिवासी विकास राज्यमंत्री, पालकमंत्री ना. राजे अम्ब्रीशराव महाराज आत्राम अध्यक्षस्थानी राहतील. समारोपीय कार्यक्रमाला प्रमुख अतिथी म्हणून भारत सरकारच्या आदिवासी कल्याण मंत्रालयाचे सचिव दीपक खांडेकर, राज्याच्या आदिवासी विकास विभागाच्या प्रधान सचिव मनिषा वर्मा, जिल्हाधिकारी शेखर सिंह, जिल्हा पोलिस अधीक्षक शैलेश बलकवडे, जि.प. चे मुख्य कार्यकारी अधिकारी डाॅ. विजय राठोड उपस्थित राहणार आहेत.
राज्यातील नाशिक, ठाणे, अमरावती, नागपूर या चार विभागातील खेळाडू या क्रीडा संमेलनात आपली प्रतिभा पणाला लावणार आहेत. १४, १७ व १९ वर्ष वयोगटातील कबड्डी, खो - खो, व्हाॅलिबाॅल, हॅन्डबाॅल या सांघित तसेच लांबउडी, उंचउडी, गोळाफेक, थाळीफेक, भालाफेक, धावणे आदी वयक्तिक खेळात झुंजणार आहेत. राज्यस्तरावर क्रीडा क्षेत्रात आपले नावलौकीक करण्याची नामी संधी आश्रमशाळेतील आदिवासी खेळाडूंना प्राप्त झालेली आहे. या क्रीडा संमेलनाच्या निमित्ताने आदिवासी संस्कृतीचे दर्शन होणार आहे. या राज्यस्तरीय क्रीडा संमेलनाची उत्सुकता शिगेला पोहचली असून आदिवासी विकास आयुक्त डाॅ. किरण कुलकर्णी यांच्या नियंत्रणाखाली व आदिवासी विकास विभाग नागपूरचे अपर आयुक्त ऋषीकेश मोडक, सहाय्यक जिल्हाधिकारी तथा गडचिरोलीचे प्रकल्प अधिकारी डाॅ. सचिन ओम्बासे यांच्या मार्गदर्शनाखाली क्रीडा संमेलनाची जय्यत तयारी अंतीम टप्प्यात आलेली असून क्रीडा संमेलनाच्या यशस्वीतेसाठी विविध समित्यांद्वारे नियुक्ती झालेल्या अधिकाऱ्यांसह  कर्मचारी उत्साहाने कामाला लागले आहेत.

 



  Print






News - Gadchiroli | Posted : 2019-01-24






Related Photos