महत्वाच्या बातम्या

नमाद महाविद्यालयात गुणवंत विद्यार्थी व प्राध्यापकांचा सत्कार

विदर्भ न्यूज एक्सप्रेस

प्रतिनिधी / गोंदिया : गोंदिया शिक्षण संस्था द्वारा संचालित नटवरलाल माणिकलाल दलाल महाविद्यालयातील कर्मचारी कल्याण कक्ष, विद्यार्थी कल्याण कक्ष व अंतर्गत गुणवत्ता हमी कक्ष यांच्या विद्यमाने एनसीसी विभागातील उत्कृष्ट विद्यार्थी, विद्यापीठ परिक्षेत गुणवत्ता प्राप्त विद्यार्थी व विद्यापीठातील विविध अभ्यास मंडळात निवड झालेल्या प्राध्यापकांचा सत्कार आज ३० एप्रिलला विशेष कार्यक्रमात करण्यात आला.

गोंदिया शिक्षण संस्थेचे मार्गदर्शक प्रफुल पटेल, अध्यक्षा वर्षा पटेल, सचिव राजेंद्र जैन आणि संचालक निखिल जैन यांच्या मागर्दर्शनात तसेच प्राचार्या डॉ. शारदा महाजन यांच्या नेतृत्वात महाविद्यालयाच्या सभागृहात आयोजित कार्यक्रमाच्या अध्यक्षस्थानी महाविद्यालयाच्या प्राचार्या डॉ. शारदा महाजन होत्या. प्रमुख अतिथी म्हणून डॉ. अर्चना जैन, डॉ. राकेश खंडेलवाल, डॉ. शफीउल्ला खान व डॉ. रविंद्र मोहतुरे उपस्थित होते.

यावेळी स्वातंत्र्याच्या अमृत महोत्सवी वर्षानिमित्य आणि महाराष्ट्र शासनाच्या निर्देशानुसार एनसीसी युनिटचे कॅडेड कपील चिखलोंडे यांनी दिल्ली येथील राजपथावरील परेड मध्ये महाराष्ट्राचे प्रतिनिधीत्व केल्याबद्दल तसेच त्याचे मार्गदर्शक एनसीसीचे लेफटनन्ट डॉ. हरिशचंद्र पारधी यांचा शाल श्रीफळ व सन्मानचिन्ह देऊन सत्कार करण्यात आला. राष्ट्रसंत तुकडोजी महाराज नागपूर विद्यापीठ परिक्षेत गुणवत्ता प्राप्त करणाऱ्या विधार्थ्यांचा सत्कार करण्यात आला. यात बी कॉम परीक्षेत द्वितीय स्थान मिळविणारी प्रगती छटवानी, एम कॉम मध्ये प्रथम स्थान यश जैन, एम कॉम मध्ये द्वितीय स्थान दिव्या अग्रवाल व तानीया अग्रवाल, एम कॉम मध्ये चतुर्थ स्थान सौदर्या मुलचंदानी, एम कॉम मध्ये पाचवे स्थान पुजा जसवानी, पुजा मंडिये व मानसी राठोड आणि एलएलबी परीक्षेत गुणवत्ता यादीत आठवे स्थान मिळविणाऱ्या संगिता मटानी यांचा सन्मान चिन्ह देऊन सत्कार करण्यात आला. सोबतच राष्ट्रसंत तुकडोजी महाराज नागपूर विद्यापीठात विविध अभ्यास मंडळावर निवड झाल्याबदल डॉ. सुयोग इंगळे, डॉ. बबन मेश्राम, डॉ. भावेश जसानी, डॉ. मस्तान शाह व पदव्युत्तर विभागाच्या शिक्षण मंडळावर निवड झाल्याबद्दल प्राचार्या डॉ. शारदा महाजन यांचा शाल व श्रीफळ देऊन सन्मान करण्यात आला. गोंदिया शिक्षण संस्थेचे मार्गदर्शक प्रफुल पटेल, अध्यक्षा वर्षा पटेल, सचिव राजेंद्र जैन आणि संचालक निखिल जैन यांनी गुणवंत विधार्थी आणि प्राध्यापकांचे अभिनंदन करून सुयश चिंतले आहे.

दिल्लीच्या राजपथावरील परेड मध्ये महाराष्ट्राचे प्रतिनिधीत्व करून आपल्या महाविद्यालयाचे नाव गौरवान्वित करणे आमच्यासाठी भूषणावह आहे. प्रत्येक विद्यार्थ्याने यशस्वी होण्यासोबतच आपल्या महाविद्यालयाला गौरवान्वीत करण्याचा ध्यास बाळगावा, असे आवाहन प्राचार्या डॉ. शारदा महाजन यांनी अध्यक्षीय भाषणातून केले.

कार्यक्रमाचे प्रास्ताविक डॉ. रविद्र मोहतुरे यांनी केले. संचालन डॉ. प्रविण कुमार तर आभार डॉ. उमेश उदापूरे यांनी मानले. कार्यक्रमाच्या यशस्वीतेकरिता डॉ. अश्विनी दलाल, डॉ. अंबादास बाकरे, डॉ.शशीकांत चौरे, लिकेश दहिकर, तुषार लिचडे, मुन्ना राणा यांच्यासह महाविद्यालयातील प्राध्यापक, शिक्षकेत्तर कर्मचाऱ्यांनी परिश्रम घेतले. कार्यक्रमाला महाविद्यालयातील प्राध्यापक व विद्यार्थी मोठया संख्येने उपस्थित होते.