महत्वाच्या बातम्या

दिंदोडा व मदनी येथे धाम नदी संवाद यात्रा

- गावात शिवार फेरी, प्रबोधन कार्यक्रम

- यात्रेत जलबिरादरीच्या तज्ञांचा सहभाग

- धाम नदी संवाद यात्रा अंतीम टप्प्यात

विदर्भ न्यूज एक्सप्रेस

प्रतिनिधी / वर्धा : स्वातंत्र्याच्या अमृत महोत्सवी वर्षानिमित्त धाम नदीला स्वच्छ, सुंदर आणि अमृतवाहिनी बनविण्यासाठी काढण्यात आलेली धाम नदी संवाद यात्रा दिंदोडा व मदनी या गावात पोहोचली. या ठिकाणी गावकऱ्यांनी यात्रेचे उत्स्फूर्त स्वागत केले. गावात शिवार फेरी काढण्यात आली तसेच झलप्रबोधनपर कार्यक्रम सादर झाला. गावकरी मोठ्या संख्येने यात सहभागी झाले होते.

कार्यक्रमाच्या अध्यक्षस्थानी दिंदोडा ग्रामपंचायतच्या सरपंच रुपाली तिखे, उपसरपंच रूपाली वायकोकर, सृजन संस्थेचे अध्यक्ष भरत महोदय, कस्तुरबा हेल्थ सोसायटीद्वारा संचालित सेवाग्राम मेडीकल कॉलेजचे स्वास्थ्य विभाग प्रमुख व ज्येष्ठ समाजसेवक डॉ.उल्हास जाजू, जल बिरादरी चला जाणूया नदीचे राज्य समन्वयक व आळंदी नदी प्रमुख पुणे येथील नरेंद्रभाई चूग, कळस गंगा पुणेचे नदी समन्वयक अंकुश नारायणकर, धाम नदी समन्वयक सुनील रहाणे, मुरलीधर बेलखोडे आदी उपस्थित होते. या सर्वांच्या उपस्थितीत शिवार फेरीचे आयोजन करण्यात आले होते.

यावेळी नरेंद्रभाई चूग, भरत महोदय, डॉ.उल्हास जाजू यांनी ग्रामस्थांशी संवाद साधला. ग्रामस्थांकडून नदी प्रदूषित होण्याची कारणे व त्यावर उपाय याविषयी माहिती जाणून घेतली. सुरुवातीला दिंदोडा ग्रामपंचायत परिसरात गावातील महिला बचतगटांकडून स्वागत करण्यात आले. सोबतच ग्राम पंचायत दिंदोडा व मदनी गावात सांडपाणी तसेच कचरा व्यवस्थापन जाणीव जागृती शिवार फेरी काढण्यात आली. मदनी गावातील भजनी मंडळाने सुद्धा उत्स्फूर्त प्रतिसाद दिला.

मदनी गावकऱ्यांच्या उपस्थितीत धाम नदी जल कलशाची पूजा करण्यात आली. मदनी ग्रामपंचायत सरपंच ललित हरिचंद्र कुरेकर, उपसरपंच बेबीताई किनाके, ग्रामपंचायत सदस्यांच्या उपस्थितीत मदनी गावात शिवारफेरीचे आयोजन करण्यात आले. मदनी आरोग्य सेवक सुभाष कामडी, दिंदोडा ग्रामपंचायतचे आरोग्य सेवक शालिग्राम नखाते, सेवाग्राम मेडिकल कॉलेजचे आरोग्य सेवक प्रकाश डंभारे, धाम नदी समन्वयक विनेश काकडे, सतीश इंगोले यांनी हा कार्यक्रम यशस्वी करण्यासाठी योगदान दिले. कार्यक्रमाचे प्रास्ताविक व भूमिका सुनील रहाणे यांनी मांडली तर आभार मुरलीधर बेलखोडे यांनी मानले.

मदनी, दिंदोडा येथे धाम नदीच्या तिरावर ज्येष्ठ प्रबोधनकार व प्रसिद्ध सप्त खंजिरी वादक भाऊसाहेब थुटे यांच्या मनोरंजनात्मक शैलीतून प्रबोधन कार्यक्रमाचे आयोजन याप्रसंगी करण्यात आले होते. चला जाणूया नदी यात्रा व शिवार फेरी, नदी स्वच्छ व अविरल, निर्मल कशा करता येतील याबाबत त्यांनी आपल्या वैशिष्ट्यपूर्ण शैलीतून विविध उदाहरणे देऊन लोकांची मने जिंकली. कार्यक्रमास मदनी व दिंदोडा या दोन्ही गावातील लोकांचा उत्स्फूर्त सहभाग होता.